Wb/nia/Aurifö si so ba dögi

Sageu mbawi sofanö numalö ba Sankt Peterburg, möi ba gosali, falukha khö nasu gatua. Ba manofu khönia nasu gatua, imane, “He bawi, hezo numalö’ö?”

“Möido ba Sankt Peterburg, mangandrö khö Zo'aya," imanö bawi.

"Faodo, möido awöu!" iŵa'ö asu gatua.

"Lau, aine!" imanö bawi.

Ba la lau mofanö. Lö ara ba falukha ira sageu mbelu. Manofu mbelu, imane, "He bawi, hezo numalö'ö?"

"Möido ba Sankt Peterburg, möido mangandrö khö Zo'aya," itema li mbelu bawi.

"Ohedo, möido awöu!" imanö belu.

"Lau, aine!" iwa'ö bawi.

Latohugö wofanöra ba falukha ira khö gawelu. Manofu gawelu, imane, "He, bawi, hezo numalö'ö?"

"Möido ba Sankt Peterburg, mangandrö khö Zo'aya," itema li gawelu bawi.

"Na simanö, faodo," imanö kawelu.

"Lau, aine!" iwa'ö bawi.

Latohugu zui wofanö, lö ara ba falukha ira khö gatufe. Ba möi göi gatufe fao awöra. Ba dalu lala, ofeta ira ba zi sambua dögi sebua ba abakha.

Manaoka mbawi ba aekhu ia bakha ba dögi da'ö. Simanö göi nasu gatua, belu, kawelu, ba katufe, ahori aekhu ira fefu bakha ba dögi da'ö.

Me no ara te'u'u ira bakha ba dögi da'ö, itörö ira fa'olofo sabölö-bölö ba lö hadöi gö si tola la'a bakha ba dögi andrö.

Ba dalu wa'olofora, mohede mbelu imane, "Hewisa na talau manunö, ba aurifö sise-ise li ta'a da'ö."

Manunö nasu gatua ba abua li nia, "Aw, aw, aw!"

Itete wanunö bawi ba alösö li nia, "Uu, uu, uu!"

Aefa da'ö ba manunö mbelu, li nia ba no atarö, "Eh, eh, eh!"

Manunö gawelu ba no ise-ise linia, "Ii, ii, ii!"

Simanö gatufe, ilau manunö ba linia no ise-ise simane gawelu. Ba maoso mbawi, asu gatua, ba belu, la ra'u gawelu ba gatufe, la'a irege atö töla zi toröi.

Mahemolunia, iwa'ö belu, "Ia da'a ta'a zabua li."

Sabua li ya'ia da'ö asu gatua, li nia no awau-wau, "Aw, aw, aw!"

Ba la'a nasu gatua. I'a nagole nasu gatua da'ö belu, ba i'irö'ö dödö ba ösi mbetu'a nasu gatua, önia ha ya'ia irege tölu wongi.

Aefa da'ö manofu khönia mbawi, "Hadia ni'amö, belu? Be'e ögu ma'ifu!"

"Ae, bawi," imanö belu sonekhe falimo da'ö, "u'a nagolegu samösa. Rawi manö dalumö ba a'ia samösa."

Hiza göi mbawi sambö fangera-ngera da'ö, i'o'ö wehede mbelu. Ba hiza lua-lua nia, ahori i'a mbawi da'ö ma'asageu belu.

Afuriata nia, hatö belu zi toröi bakha ba dögi da'ö. Hadia i'ila möi baero moroi ba dögi da'ö belu, ma zui te'u'u ia bakha ba dögi da'ö? Samösa lö sangila.

Nifa'anö: ???

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö ???. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö