Wb/nia/Asu Gatua ba Sanagu Nukha

Alua manö-manö da'a ba ginötö me so nasa Yesu Keriso ba nifahaönia si-12 ba gulidanö.

Samuza luo, mowaö-waö Yesu awö nifahaönia ba aröu lala latörö. Ba dalu lala so sageu nasu gatua, mohede ia khö Yesu.

"He Tua Yesu, olofodo," i'andrö ena'ö ibe'e gönia Yesu.

"Ofanö, ae a kudo si'alawe," itema linia Yesu.

Ilau mofanö asu gatua, i'ondrasi sageu kudo si'alawe.

"He kudo si'alawe, no ifatenge ndra'odo Tuada Yesu ba wemanga ya'ugö."

Tokea kudo si'alawe andrö, ba lö iforoma'ö wamanizi dödönia, mendrua manö wa aröu ebua mbotonia moroi khö nasu gatua.

"Tola manö wö sa. Ba hulö ambö i fagöna. Ba mbotogu andre ba so zura izi, no tetanö ia ba narö gahegu, abe'e sibai na ö'usu."

"Na simanö foroma'ö ia khögu," imanö asu gatua.

"Lau, ae furigu, da'uforoma'ö ia khöu.”

Lö itaha kudo, itifa nasu gatua furinia faoma ahe. Tezaumba nasu gatua mato önö mete. Ba oi adudu nifönania. Ba ösö ilau moloi kudo.

Lö ara ba ifuli möi nasu gatua khö Yesu Keriso. "He Tua Yesu, no u'o'ö niŵa'ömö, ni'o'oumö ya'o. Harazaki wa lö aetu nosogu ibe'e kudo. No itaraido..."

Itema li nasu gatua Keriso, "Na simanö, ba ae khö mbiri-biri simatua."

Ifanaoka ia asu gatua, möi ia i'ondrasi mbiri-biri simatua.

"He biri-biri, iada'e ba u'a ndra'ugö. Da'a ni'o'ou Zo'aya!" No i'ebua li asu gatua ena'ö irongo linia biri-biri simatua andrö.

Itema linia biri-biri. "Na omasi'ö ö'ado, ba lö hana-hana. Da'ösö ulau mozizio yaŵa ba zuzu hili andrö, ba henagö'ö, ufazaumbado ba gamaudu mbawamö. Base'ö, he!"

Ihenagö ia asu gatua, ibokai mbawania.

Ba ginötö da'ö, iwuwu ia furi biri-biri, i'aröu'ö ia khö nasu gatua. Ösö ilau fagohi sabölö-bölö ba itandru högö nasu gatua.

"Bruk....!"

Tezaumba nasu gatua ba malidöngö khönia danö. Me mangawuli hanu-hanunia, ibokai hörönia, ifakhölö ia, ba no awai lö hadöi sa'ae mbiri-biri sotandru ya'ia no mege. No awai ilau moloi ba hili, ibini'ö ia.

Ba höinia sitotane nasa, ilau mofanö ifuli möi nasu gatua khö Yesu Keriso.

"He Tua Yesu, no ilimodo biri-biri simatua andrö. Harazaki walö aetu nosogu ibe'e," mangadu nasu gatua.

Itema linia Yesu, imane, "Ba lau, iada'e, me olofo sibai ndra'ugö, ba ae khö zanagu nukha."

Me irongo da'ö ba ilau mofanö zui asu gatua. Möi ia ifalukhaisi zanagu nukha. Ibato halöŵönia sanagu nukha andö me i'ila tohare dome si lö mukaoni.

"He sanagu nukha, ma'ökhö ba u'a ndra'ugö. Nifatenge Yesu Keriso ndra'odo ba itehe u'a'ö!" Imanö asu gatua khö zanagu nukha andrö.

Tokea zanagu nukha. "Fatua lö ö'ado, ba damöido ua mangona khö wo'omogu ba khö ndraonogu. Hadia tola?" Imanö sanagu nukha khö nasu gatua.

"Tebai! Lö utehe möi'ö mangona. Niŵa'ögu iada'e ba u'a ndra'ugö."

"Na simanö, na lö ötehedo mangona khö nösi nomogu, ba fatua lö ö'ado, ba da'usu'a'ö ua, hadia monahado bakha ba mbetu'amö."

Ihalö zu'a-su'ania sanagu nukha andrö si no isaitagö ba mbaginia.

Fao göi dödö nasu gatua. "Lau, su'ado!"

Igogohe gi'o nasu gatua sanagu nukha. Ifali ba dangania. Ba ba ginötö da'ö i'ohalö wamözi kaso, ihawiaigö mewulu kali ba hulu nasu gatua.

Ilau mu'ira-ira asu gatua. Ifanara-nara ia irege aetu gi'onia ba i'olau'ö moloi. A'oi atoru ndronia ba akela-kela nasu gatua si lö i'o.

Ba dalu lala, ba falukha ia dafitu nasu gatua bö'ö. Lasofu khö nasu gatua si lö i'o andrö, "Hana ndra'ugö? Hadia zi no göna ya'ugö?"

"Sanagu nukha, no i'etu'ö gi'ogu, ba iböbözido."

"Hezo toröi ia?"

"Ba da'ö si sa, ba zinga lala andrö." I'ombakha'ö nahia zanagu nukha asu gatua si lö i'o.

"Aine datagohi ia, talau mbalö nasu gatua si lö i'o." Imanö kafalo nasu gatua si fitu nga'eu andrö.

I'ila sanagu nukha wa lagohi ia ira asu gatua ba i'anöisi geu fondrege zalaŵa. Eu salaŵa ba da'ö ya'ia töla manawa.

Me la'ila ia ira asu gatua ba latarogö tou ba mbörö geu manawa si so sanagu nukha.

"Tabase'ö manö ia ba da'e ofeta möi ia tou. Asu gatua si lö i'o, ya'ugö tanö tou, damöiga yaŵa ba hulumö, ba tanö bö'ö möi yaŵa ba hulu irege fefu ita tola idugu ahatö khö zanagu nukha," lamanö ira asu gatua.

Möi ira ba hulu nawöra ba no idugu alaŵa ira.

Me i'ila idugu ahatö ndra asu gatua, mu'ao zanagu nukha.

"Ufatunö khömi fefu wa tenga salagu zalua andrö, no börö gamuata nawömi asu gatua silö i'o. Ya'ia zamörötaigö! Ahakhö dödögu ami, me ifakao ami, ba tola göi ubali'ö ami fefu lö i'o."

Me irongo da'ö si lö i'o ata'u ia. Ifaligoi ia, ilau moloi. A'oi aekhu tou nasu gatua. Ba idugu aukhu dödöra ba lagohi zi lö i'o ba la'u'usu irege aetu nosonia.

Me i'ila no mofanö fefu nasu gatua ba ifata'i we'amöi tou ba hogu manawa sanagu nukha ba i'ösö mangawuli ia ba nomonia. Aefa ia moroi ba zilako.

Nifa'anö: Apolonius Lase

Nitöngöni

Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia. Be ba gahe zura: Moroi ba Wikibuku Nias. Nifa'anö Apolonius Lase. Aila ita ba niha na lö öbe'e gumbunia, me öhalö töiu zi tenga töiu.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö