User:اقرارالدین خسرو

From Wikimedia Incubator

کھوار افسانہ.

نو دونی عاشقی۔

اِرم دُوروتے شوئیے ای بِینجو کانو موڑا نیشی دربت دونیتائے۔ اِرمو غیچھار فقط لئے اشرو چوٹاوشتانی۔ دورو ویشکی راہی بیکو دی پونگتو پوردوغوچو بوتیرو غون غوزار قائی۔ اِرمو ہتے لولوٹ شوم شا غیچ کیڑی کیڑی کوکوش بیتی اوشونی۔کُتاچَپو غون پھوک اشپیرو وا ٹھار پنڈورو موخ دوغورا بہچی اوشوئے۔ اِرم جو سال اچہ تان دورو ویشکی راہی بیتی زندگیہ اولو مکالہ بو پریشان اسیتاے۔ اِرم زارولی ہیڈ ماسٹرو چھؤے ژیژاوان سورا پِھسکی ای پھولوک ژور۔ اِرمو سار زیزق جو برارگنی یونیورسٹیہ سبق رینیان۔ ہیتان سار زیزق چھور برارگینی سبقان پورا کوری جام جام عہدہ ملازم۔ دوری پیسو کیہ نس نیکی۔ اِرم ای پھولوک بیکن سفو وخشی کیہ دی اشناریوت گوروم کہ بوے لوو زبانتو ئی نیسیک برابر برارگینی ارمانو پورا کونی۔ اِرم چھترارو پرائیویٹ کالجہ جوہ جوا سبق راوشتاے۔ہاسٹلہ ہال باوشتاے مگم ہر جوو انوس برار گینی ہاسٹلہ گیاو تو پاشینی۔ہیغار غیر تازگیو بشارو گنیکو بچے ای موبائل دی گانی توتے دیتی استانی۔ وا انوسی جو تروے مکالہ دی ٹیلی فون کوری تازگیو بشارو گانینی۔ ای انوس ای نوغ نمبرارا ٹیلی فون ہاے۔ جو دفعہ فونو نو اسنیتاے تروے مکالہ فونو اوسنیے سلام بشاراحوال کوری لوڑتاے کہ نوژان نفری ۔۔ اے مہ شیرین برار تہ ہوش نو ارتام وا ریکو پھار ہاسے ریتاے کہ اے نیسے مہ کیہ ہوش کوسان لوٹ ہوو نا۔۔ نو لا برار وا دی تان لوو دیت کہ؟ اوا ارسلان اسوم لا جاوید ارسلان۔ اِرم۔ اے برار اوا تہ ہوش نو کومان تو کوسوم لو دوسان۔ ارسلان۔ اے ہوش کوس لا آخر تہ سوم لو دومان تہ نمبرا کال کوری خور کوسوم لو دوم۔۔ ارم۔ مہ نمبرو تتے کا پراے؟ ارسلان۔ تُکا۔ ارم۔ کیہ مطلب؟ ارسلان۔ اے تُکا لا اوا تکا لگئے مختلف نمبران ڈائل کوری لوڑاوشتام کورا ای ہم خیال رویو نمبر چاکور رے ہنون اللہ تہ متے پراے وا۔ ارم۔ اے مہ برار ئی لوڑے اوا ہش کومورو نو جامہ اوا بو خاندانی رویان موژار مہ برارگینیانتے کہ پتہ ہوے تہ دی مہ دی نس نس کوری پیچھونی جامہ۔ ارسلان۔ اولو لو تہ بچے بریکو لیران کا؟ جوو لو اوا دی خاندانی رے تتے کال کوری استام کیہ بے خاندان رویو سوم اوا کورا اہی گانیمان۔ ارم۔ مہ شیرین برار کیاغ کہ براے وا متے کال مو کو مہ سوم وخت نیکی اوا تانتے سبق ریمان۔ ارسلان۔ اے گدیری سبق ریکو اوا کیہ تہ کتابان الیشامانہ؟ ہیہ قسمہ ارسلان فی لووتے جواب دیاو ارمو لاجواب کورکو ارم فونو چھینیتاے۔ مگم ارسلان باربار قسمہ قسمہ مسیج کوری وا کال کوراو آخر ارمو ہردیہ پھؤک ژاغہ ساوزیکہ کامیاب ہوے۔ ارم اگرکہ جام رویان موژار وا سبق راک کومورو اوشوے مگم وا دی عورت پھؤک نادانی کوری ارسلانو شوکھور شوکھور لوان سورا یقین کوری ارسلانوتے تان ہردیہ ژاغہ پراے۔ لش بیتی ای انوس جو کھاڑ ملاؤ بیکو بچے دی رضامندی ظاہر ارینی ۔۔ ارم سبقہ دی کالجہ سفانسار جام اوشوے وا صورتہ دی ھاتو غون کا نو اسیتانی. ای وشکی ارسلان دوست محمد (دُستیو) لوٹھورو ژاو سبقو جوہ جوا بی بھگوڑا بیتی پیچھیتاے. دورو دی کیہ خاص آمدن نیکی ہورو تان دی کیہ ای روپیہ ہوستار نو گوے. مگم صورتہ شییلی بیکین دیتی کوموران تو بچے بریونی. ہے انوس ارمو سوم ملاو بیکو بچے جام تان سورو ساوزے گیتی اسور. ارمو نقاب بوتی شیر شا عینک چاکے کیاوت کہ ارسلانو سوم ملاو ہوے. ارم ارسلانو پوشی تان ہردیہ خوشان ہوے کہ مہ خوشپان شہزادہ مہ خیالو غون شییلی بیراے رے. ملاو بیتی ای گازا نیشیتانی ارسلان تانسوم اوشک پیاروم وا بسکٹ انگیتی استاے ہیس تیزے ہیتان بیچھیرتاے ارم ہیتان ژیبیکو بچے نقابو کہ بیچھیرتاے ہو ژانک بوم رے سخت افسی اسیتاے ہے موژی ارم دی شرمندہ شرمندہ بیتی نقابو بیچھیرتاے. اِرم شماغو اہی پیچھیکو دنیا ای روشتی اریر ۔ تب گیر چھؤیو بہت ئی نسیتاے پنجرشو مس۔ ای ناز کوریتاے چھؤم ہوسیتاے پنجرشو مس۔

ارسلان ہیغار پروشٹی دی دوستیو نامہ بو کمورانان چالیستاے مگم اِرمو غون شییلی کمورو ہمونیہ پت نو پوشیستاے۔ ہو پوشی ارسلانو پیشانئی دی تق تق خیل ہانی۔ ارم شرارتی اندازہ۔۔ ڑؤ مس پوشیرو غون کیانی بوسان نیشی مشقول نو بوسا؟

موخہ لوڑی کھاڑ ایوالی ایوالیو خوشیتانی۔ مگم ارسلان تان اوچے تان دورو بارا بو لوان چنگی استاے۔ ارم ہو صورتو پوشی غیچھان نیشئے سف لوان سورا یقین اریر۔ نیشی مشقولگیو موژی ارسلان ارمو گوڑی ہوست انگیتی فوٹو نیکو چق ہوے۔ ارم اچی غیستی بکو ارسلان ریتاے کہ ہیہ زیڈ ٹن موبایل پاس ورڈ چاکیسوم مہ سار غیر خور کا لوڑیکو نو بونی۔ تہ مہ سورا دی یقین نیکیہ رے۔ تو گانی فوٹو نیتاے۔ اولو ملاقات پوروزیتاے ہے سوم ہیہ سلسلہ چالو ہوے۔۔ چنگیک کلہ پت کھؤشت بوے لش لش بیتی ارموتے ارسلانو بھگوڑائیو چے تو دورو حالات سف پتہ ہونی۔ ارم اچی غیستی بیکو ارسلان دی ہوش اریر اخری ارسلان ارمو دھمکی دیک شروغ اریر۔ تو مہ سوم اوشٹوریس ورنہ تہ فوٹووچے تہ مشقولگیو ریکارڈنگ مہ سوم شینی اوا ہتیتان نیٹہ دیتی تہ خاندانو بے عزت کوم۔ ارم ہیہ لوا بو پریشان ہوے برارگینیان عزت خاندانو عزتوتے لوڑی سخت مجبور ہوے۔ ای وشکی ارسلانو دھمکی تیز باو ہانی۔ ارم آخری مجبور بیتی کیڑ کیڑاو ارسلانو سوم اوشٹورتاے۔ ارمو ارسلانو سوم اوشٹوریکو خبر دورا پتہ بیتی دورا فقط بریک دوری ہوے مگم سیرو موڑو اوغ اف شوخسیکار اچی وا کیہ فائدہ۔۔۔ ہے وشکی ارسلان ارمو گانی بپ دوریا التی خطبہ بیتی دورتے الاے۔ دورو رویانتے ارسلان تان چھیک اوشوے ہنسے خور بلاہ تان سوم گانی الاے رے دورو رویان کیہ دون ژینگ نو مگم دنیو مدارو کونیان۔۔ وخت انوس شوخسیتانی ارم انوسار انوسوتے تنگ باو ہاے۔ ارسلانو سوم انوسی جنجال مگم ہسے کیہ کارو شوئی نو لاکاو بھنگی ملگیریانتے چیق دی زیاد وخت دیکہ پراے۔ ارم تو روے گانی مہ دورو رویان پروشٹہ بوغے ریر مگم ہے بچے دی جیپو کیاغ بیلی۔ ارسلانو جیپو خڑاو تراویح کوراوشتاے۔ ہے قسمہ جو سال پھار بغانی۔ ئی ارمو دورو رویان دی قہر اف دیتی ای پھولوک ژورو بچے ہردی پھت اوشونی مگم ہتیت دی عزت مشکاوشتاونی روے گانی اسپہ پروشٹہ گوے رے ۔ ارسلانوتے ملگیری مشورہ پرانی تو کیہ قسمہ غیچی نیسے تہ گومتگینی پیسہ دار روے تہ سوم دی مالی مدد کونی رے۔ ارم دیہو رویان مشکی شاپیک دیتی اشپاشور بولان پروشٹہ ویشیکو تیاریہ اسور۔ چھؤچی راغیشٹی خبر ہاے کہ ہیتان دیہو ژانہ خان صوبیدار بیہوش بیتی ژویو پیچھی شیراے ھاتو ہسپتالوت اوانی رے۔ ژانہ خان صوبیدار ہسپتالہ تاریکو ہوشہ گیتی بیان دیتی اسور کہ اوا دوکانوتے مال انگیاو پشاوروت بوغاوشتام جو ڈقانان گیتی مہ گوڑو لوق توئی بان دیتی مہ لاکوچے پھت روپیان دی التیسونی۔۔ پولوسان گیتی تفتیش کوری ارسلانو چے تو ملگیریو جیلوت اوانی۔ ئی ارسلانو دورو روے اِرموتے تو کیہ منحوس بیراو تہ پورنیکہ ہیہ بیزتی دی رویو چرینیہ چؤکیتاے رے ہو دیتی دوراراڑیتانی۔ اِرم فقط لیے کیڑاو تتو دورو شویا گیتی دوندونہ اسور ہے موژی گورزینو اچھین گیتی گورزینہ لوٹھورو بریژایو رویتو پراے ہے بریژایو پریشٹی گانی ہو سوم ضدی مگم سورا نیکو نو باوشتاے. اِرم خِڑییک کوری بریژایو نسوتے بیکو بریژایو تو پھر زُوق دیتی.. اے بیزت کیانی بوسانیے تیز اف نیسے اسپہ موخو موڑو کوری بی اسوس. تان شیروغون برارگینیان موخو شا کوری وا کہ شرمو گانی ھیہ چرینتو اوتیسان . تیز بوغے تہ برارگینی کہ پوشتانی تہ سوم کوری مہ دی مرینی رے زُوق دیتی داڑیکو.. اِرم کیڑی کیڑی غیچہ اشرو دی چھؤچھو بیتی اوشونی. انگار شار استونی خور ویشکی راہی ہوے. دروچ پوچیو سینو ٹیپیو وخت اِرم ای چت سیرو ٹیکہ غیچی ہاے ہاتے سوم ته كي نو پوشیرو مه دی نو.. ختم اقرار الدین خسرؤ


https://incubator.m.wikimedia.org/wiki/Wp/khw/%D8%A7%D9%82%D8%B1%D8%A7%D8%B1%D8%A7%D9%84%D8%AF%DB%8C%D9%86_%D8%AE%D8%B3%D8%B1%D9%88