Talk:Wt/kab/Asebter agejdan

Ur deg twaγit n wayeḍ taḍsa Sγer : D.Messaoudi

Taḥkayt-a teḍra s tidet deg kramkan deg Tmurt n Yiqbayliyen. Ffreγ isem n taddart, rniɣ beddleγ ismawen n yimdanen, akken ur d-nesseqcar ideddicen γef zrin yakan yiseggasen d yiseggasen.

D taṣebḥit yerna iṭij n unebdu yeḥma yakan nezzeh ; imseddaren akkit ttnadin anida ara ddarin. Muḥend akked umeddakel-is Yidir ṭṭfen yakan imukan-nsen deg yiwet n tezniqt tamilit yuẓen γer yixxamen-nsen.

Yidir d argaz n 25 iseggasen deg uwtay-is, yerna werεad yezwiğ. Wamma Muḥend, yezger yakan 35 yerna γer-s kraḍ n warrac; yiwen deg-sen d ukrif, isem-is Meẓyan. Yal tikkelt ara d-yezri Meẓyan sdat-sen, ad yebdu Yidir akkexkex d uwehhi: “A muqel kan a Muḥend i mmi-k amek yettazzal ? Ha ! Ha ! Ha !” . Am yirgazen akk iḥemmlen arraw-nsen akk-n bγun ilin, Muḥend amzun d ijenwiyen ay yekkaten deg wul-is mi ara isell i Yidir yettaḍsa γef mmi-s umi tezleg tqejjirt. “Iyya wiyya-k a Yidir ur ttaḍsa ara γef twuγa n medden”, ay as-yeqqar yal tikkelt. Amalah, Yidir werğin ay as-yesmuzget.

Zrin yiseggasen, yezweğ Yidir d yuγal ula d netta d ababat; yerna γer-s yiwen uqcic d ačuṛan, d amelḥan, zun d angellus. Yeččuṛ axxam s ufṛaḥ, dγa isemma-as Farḥat. Maca skud yettimγur uqcic-nni, tettban-d yiwet seg tqejjirin-is wezzilet, tezleg. Asmi yezger uqcic i tallit n umured, yerna iγelli yal ma ara yeεreḍ ad yebded γef iḍarren-is, ur d-yeggri deg-s ucukku: d ukrif. Zun wwten yijenwiyen deg wul n Yidir.

Armi d yiwen wass, mi akk-n yeqqim Yidir d umeddakel-is Muḥend deg umkan aydeg uγen tanamit ttγimin, yezri-d Farḥat sdat-sen; yetteddu yesrejdil. Yebra Yidir i uqerruy-is d wallen-is ttmecruruqent s yimeṭṭawen. “Yax nniγ-ak ur ttaḍsa ara deg twuγa n medden, a Yidir”, ay as-yenna Muḥend. Sakkin qqimen akk-n deg tsusmi armi d imir deg kkren yal wa yerra s axxam-is.

________________________ Tamsirt: win yeḍsan γef win d-yebla Ṛebbi, krawass tawaγit γer-s ad d-tezzi.