Wn/shn/ယွၼ်ႉယူႇၶရဵၼ်း တိုၵ်းတေႃးလႄႈ ရတ်ႈသျႃး လႆႈဢိုတ်းႁူင်းၸၢၵ်ႈၼမ်ႉမၼ်းၸၢၵ်ႈ

ဝၼ်းဢႃးတိတ်ႉ၊ မေႇ 19၊ 2024 

မၢၵ်ႇမိသ်ႉသၢႆး ATACMS

ယူႇၶရဵၼ်းၶဝ် ၸႂ်ႉ မၢၵ်ႇမိသ်ႉသၢႆး ATACMS ဢၼ်ဢမႄႇရိၵၢၼ်ႇႁဵတ်းသေ တိုၵ်းတေႃးမႃးတီႈ ထုင်ႉၶရၢႆးမီးယႃးသေ၊ တီႈတၢင်ႇတီႈတၢင်ႇထုင်ႉၵေႃႈ ဢဝ်တင်း တရုၼ်း မွၵ်ႈ 60 လမ်းၼႆႉ တိုၵ်းတေႃးမႃးၼႆ ၸိူဝ်းပဵၼ် ၽူႈမီးပုၼ်ႈၽွၼ်း ရတ်ႈသျႃးၶဝ် လႆႈမွၵ်ႇလၢတ်ႈ မိူဝ်ႈၼႆႉယဝ်ႉ။

ၶဝ်လၢတ်ႈဝႃႈ ယွၼ်ႉပိူဝ်ႈ လွင်ႈတိုၵ်းတေႃး ႁၢဝ်ႈႁႅင်းလႄႈ ၵၢၼ်ႁုင်ၼမ်ႉမၼ်းၸၢၵ်ႈ ဢၼ်မီးတီႈ ပွတ်းၸၢၼ်းမိူင်းၼၼ်ႉ လႆႈၵိုတ်းဝႆႉ ဝႃႈၼႆယဝ်ႉ။ ထၢၼ်ၽွင်းလူင် ၵၢၼ်ၵႅတ်ႇၵင်ႈရတ်ႈသျႃး ပိုၼ်ၶၢဝ်ႇမႃးဝႃႈ တီႈထုင်ႉၶရၢႆးမီးယႃးၼၼ်ႉ ၵၢၼ်ၵႅတ်ႇၵင်ႈ ၵၢင်ႁၢဝ်ရတ်ႈသျႃး လႆႈလတ်းသေယိုဝ်းတူၵ်း မၢၵ်ႇမိသ်ႉသၢႆး ၵဝ်ႈလုၵ်ႈ ဢၼ်ဢမႄႇရိၵၢၼ်ႇႁဵတ်းၼၼ်ႉသေ၊ တီႈ ထုင်ႉ ၵရသ်ႉၼူဝ်ႇတႃႇ ၼၼ်ႉၵေႃႈ လႆႈယိုဝ်းတူၵ်း တရုၼ်း 57 လမ်း လႄႈ တီႈထုင်ႉ ပႄလ်ၵူဝ်ႇရွတ်ႉ ၼၼ်ႉ လႆႈယိုဝ်းတူၵ်းမႃး 3 လမ်း ဝႃႈၼႆယဝ်ႉ။

ၸဝ်ႈၼႃႈတီႈ ပိုၼ်ႉတီႈၶဝ် လၢတ်ႈဝႃႈ တရုၼ်း ႁူၵ်းလမ်း လႆႈလုတူၵ်းသႂ်ႇၼိူဝ် ႁူင်းၸၢၵ်ႈ ႁုင်ၼမ်ႉမၼ်းၸၢၵ်ႈ ဢၼ်မီးတီႈ သလေႇဝီးယၼ်သ်ၶ် တီႈထုင်ႉ ၵရသ်ႉၼူဝ်ႇတႃႇ ၼၼ်ႉဝႃႈၼႆယဝ်ႉ။ ႁွင်ႈၵၢၼ်ၶၢဝ်ႇရတ်ႈသျႃး Interfax လၢတ်ႈမႃးဝႃႈ ဝၢႆးသေ လွင်ႈတိုၵ်းတေႃးယဝ်ႉ လႆႈၵိုတ်းဝႆႉ ၵၢၼ်ငၢၼ်းဝႃႈၼႆယဝ်ႉ။ ၵပ်းၵၢႆႇလူၺ်ႈ လွင်ႈလႆႈၵိုတ်းဝႆႉ ႁူင်းၸၢၵ်ႈၵၢၼ်ငၢၼ်း ႁုင်ၼမ်ႉၸၢၵ်ႈ ၶွင်ၵူၼ်းမိူင်း ဢၼ်ႁဵတ်းဢွၵ်ႇၼမ်ႉမၼ်းၸၢၵ်ႈ ၼိုင်ႈဝၼ်း 1 လၢၼ်ႉပေႇပႃႇ လႄႈ ၼိုင်ႈပီ ႁဵတ်းဢွၵ်ႇ ၼမ်ႉမၼ်းၸၢၵ်ႈ သီႇလၢၼ်ႉ မႅတ်ႉတရိတ်ႉတၢၼ်ႇၼၼ်ႉသေ ၽၢႆႇလူင်ပွင်ၸိုင်ႈ ရတ်ႈသျႃး ပႆႇႁၼ်မီးလွင်ႈမွၵ်ႇလၢတ်ႈသေၸိူဝ်ႉသေလွင်ႈၼင်ႇၵဝ်ႇ။

ငိူၼ်ႈငဝ်ႈတိုၼ်း

• Guy Faulconbridge and Maxim Rodionov. "Russia says Ukraine makes 62-drone attack on Russia, oil refinery halted" — Reuters, May 19, 2024
• AFP. "Russian Refinery Halts Operation After Drone Strike" — The Moscow Times, May 19, 2024
• Bloomberg News. "Russian Oil Refinery Hit as Moscow’s Troops Press Kharkiv Region" — Bloomberg News, May 19, 2024