Wp/wls/Sesu Kilisito

From Wikimedia Incubator

Ko Sesu ne’e ko he laumālie ne’e ma’uli ’i te lagi ’i mu’a ’o tana ha’u ki te kele. Ne’e ko ia te ’uluaki fakatupu ’a te ’Atua, pea ko ia ’aē ne’e fakahigoa’i ko te ’Alo “ ’uluaki tupu” ’o te ’Atua. Ko Sesu ’e ko te Foha ’aē ne’e fakatupu totonu e te ’Atua. Ne’e faka’aoga’i e Sehova ia Sesu, ’i tana nofo ’aē ’i te lagi ’i mu’a ’o tana tupu tagata, ohage ko hana “tagata gāue faiva” mo’o fakatupu ia me’a fuli ’aē ’i te lagi pea mo te kele. Ne’e toe faka’aoga’i foki ia ia e te ’Atua ohage ko Tana tagata ’ave folafola tāfito. Ko te tupu’aga la ’aia ’o te fakahigoa’i ’o Sesu ko “te Folafola.”

Ne’e momoli ifo e te ’Atua Tona ’Alo ki te kele ’o ina tuku tona ma’uli ki te ’alo ’o Malia. Koia ne’e mole tupu Sesu mai he tāmai fakatagata. Ko te tupu’aga la ’aia ’o tana mole tupu agahala pea mo tupu he’e haohaoa. Ko te ’u tupu’aga e tolu ’aē ne’e fekau’i ai e te ’Atua ia Sesu ke ha’u ki te kele: Mo’o ako’i kia tatou te mo’oni ’o ’uhiga mo te ’Atua ke nofo agatonu ’i tona ma’uli katoa, ’o ina tuku mai kia tatou he fa’ifa’itaki ke tou muli’i, pea mo’o sakilifisio’i tona ma’uli ke tou ’āteaina mai te agahala pea mo te mate. He ko’e ne’e ’aoga te fa’ahi ’aia?—Mateo 20:28.

’I tana talagata’a ’aē ki te fakatotonu ’a te ’Atua, ko te ’uluaki tagata, ia Atama, ne’e ina fai te me’a ’aē ’e higoa’i e te Tohi-Tapu, ko te “agahala.” Koia ne’e fakatū’a ia ia e te ’Atua ki te mate. Ne’e mole kei feala hana mulimuli ki te ’u lekula ’a te ’Atua, ne’e mole kei haohaoa ia. ’Aki te temi, ne’e liliu ’o matu’a pea mate ai. Ne’e foaki e Atama te agahala ki tana ’u fānau fuli. Ko te tupu’aga la ’aia ’o tatatou liliu ’o matutu’a, ’o mahahaki, pea mo tou mamate. Ne’e lava feafea’i ke hāofaki te malamanei?

Ko Sesu ne’e ko te tagata haohaoa ohage pe ko Atama. Kae, ne’e mole hage ko Atama, he ne’e fakalogo lelei ia Sesu ki te ’Atua, mā’ia mo te ’ahi’ahi’i lahi ’aē ne’e hoko kia ia. Koia, ne’e feala ai ke ina sakilifisio’i tona ma’uli fakatagata haohaoa mo’o totogi te agahala ’a Atama. Ko te me’a ’aia ’aē ’e ’ui e te Tohi-Tapu ko te “totogi.” Kua feala ai foki ke ’āteaina te ’u fānau ’a Atama ke nātou ’āteaina mai te fakatū’a ki te mate. Ko nātou fuli ’aē ’e nātou tui kia Sesu, kua feala ke fakamolemole tanatou ’u agahala pea mo nātou ma’u te ma’uli he’egata.

’I tana ’i te kele, ne’e fakamālōlō e Sesu te kau mahaki, ne’e ina fafaga te haha’i ’aē ne’e pakupaku, pea ne’e ina faka gona te ’u afā. Ne’e ina toe fakatu’uake foki mo te kau mate. He ko’e ne’e ina fakahoko te ’u milakulo ’aia? (1) Ne’e ’ofa mamahi ki te haha’i ’aē ne’e lotomamahi, pea ne’e fia tokoni kia nātou. (2) Ne’e fakamo’oni e tana ’u milakulo ko ia ko te ’Alo ’o te ’Atua. (3) Ne’e fakahā e te ’u milakulo ’aia te me’a ’aē ka ina fai anai ki te haha’i fakalogo ’i te temi ’aē ka pule anai ki te kele ’i tona ’uhiga Hau.

Ne’e mate ia Sesu pea ne’e fakatu’uake ia ia e te ’Atua ko he laumālie, pea ne’e toe liliu ki te lagi. Talu mai ai, kua fakanofo Hau ia ia e te ’Atua. Kua ōvi mai te temi ’aē ka haga ai anai ia Sesu ’o pulihi katoa te agakovi pea mo te mamahi ’i te kele.