Caracol se wey wan kojtik teupan Maya tik ne Cayo distritoj.
Belice ne ume mas chikitik estadoj ipal ne Shiktal. Kiyawaluat Meshijku ka ajkuikpa wan Kwajtemalan ka tatzinu wan nusan kan ne ladoj ne tunal kalaki, ka taneshkan nemi ne weyat Atlantico wan Caribe. Nemit semaya anka 330,000 ipal chanejket. Ne weytechan itukay Belmopan wan ka ne nemi ne tatuktiani ipal Belice itukay Dean Barrow. Ne tumin ipal Belice ne Dolar. Tik Belice muchi ne chanejket taketzat Kriol, melka ne Ingles ne taketzalis mumachtiat tik ne tamachtiluyan. Anka 10% u achka 33,000 chanejket Maya metzali taketzat Maya, ne Yucatec inawak Mejshiku u Mopan inawak Kwajtemalan. Ne teupan Maya itukay Caracol kenhayuk ne mas kojtik weykal (edificioj) tik Belice, nemi tik ne Cayo distritoj 76 km ka tatzinu wan oestej ipal Tikal. Miak chanejket turistaj yawit pal Belice pal tachiat ne tejteupan Maya, wan nusan ika Belice kipia ne ume mas weyak arrecifej ipal ne Tal; Australia kipia ne achtu mas weyak. Nusan Belice tajpiat 36% ipal ne kujtan kan kipiat kenhayuk miak kwajkwawit, wan yektzin tutut ken ne Tukan. Nusan, nemi se wey kujtan tajpishtuk (parquej) ne kipiat 400 km2 kan kitajpiat ne Tekwani.
Ne tiltik orkideaj, ne shuchit nacional ipal BeliceNe tekwani se wey mistun ipal ne imiakawan Felidae.
