Wp/pnb/مہاراجہ رنجیت سنگھ
From Wikimedia Incubator
مہاراجہ رنجیت سنگھ پنجاب چ سکھ سلطنت دا بانی تے سکرچکیہ مثل دے سردار مہان سنگھ دا پتر سی ۔ 13 نومبر 1780ء چ گوجرانوالا دے نیڑے پیدا ہوئیا ،بچپن چ ای چيچگ دی وجہ توں اسدی اک اکھ ضائع ہوگئی سی ۔ 12 سال دا سی کہ اسدا پیؤ مر گئیا تے ایہہ مثلدا سردار بن گئیا ۔ ۔
رنجیت سنگھ دا ویاہ 16 ورہیاں دی عمر چ کھنیا مثل چ ہوئیا تے اینہاں دوناں مثلاں دے ملاپ نال اسدی طاقت ہور وی ودھ گئی ۔ اسدی سس سدا کو اک قابل تے پردھان عورت سی ، جس نے اسدیاں کامیابیاں چ اسدی بہت مدد کیتی ۔ 19آں سالاں دی عمر چ 1799ء چ اسنے لہور تے قبضہ کر کے اسنوں اپنا راجگھر بنا لئیا ۔ 3 سال بعد 1802ء چ امرتسر فتح کیتا اوتھوں بھنگیاں دی مشہور توپ تے ہور کئی توپاں ہتھ آئیاں ۔ کجھ ای ورہیاں چ اسنے سارے وسطی پنجاب تے ستلج تک قبضہ کرلئیا ، فیر ستلج پار کرکے لدھیانے تے وی قبضہ کرلئیا ۔ لارڈ منٹو رنجیت سنگھ دی اس پیش قدمی نوں انگریزی مفاد دے خلاف سمجھدا سی ، چنانچہ 1809ء دے عہدنامہ امرتسر دی رو نال دریاۓ ستلج اسدی سلطنت دی جنوبی حد قرار پائی ۔ ہن اسدا رخ شمال مغرب ول ہوگئیا تے لگاتار لڑائیاں دے بعد اٹک ۔ ملتان ، کشمیر ، ہزارہ ، بنوں ، ڈیرہ جات ، تے پشاور فتح کرکے اپنی سلطنت چ شامل کرلئے ۔
