Wp/pfl/Smartphone

From Wikimedia Incubator

Ä Smartphone (ausm Englische werdlisch iwwersetzt: schlaues Telefon) is e mobiles Telefon wu zusädslisch iwwer e Paked von charakterischdische Zusatzfunkzione verfischd, insbesonnere iwwer en Terminkallener, Noddizbuch, Adressbuch, Daschereschner sowie die Meschlischkeit Faxe und E-Mails zu sende un zu empfange.

Schun des ersche Smartphone, des Simon vun de amerikonische Compjuterfirma IBM, des 1992 uff des Compjutermess COMDEX in Las Vegas, USA, vorgschdeldt worre is, un ab 1993 iwwer die US-Tefonfirma Bellsouth vertriwwe worre is, hodd iwwer diese Funktione verfischd. Ach kleene Compjuterschpiele konnt mer mit dem Simon schun schpiele.^[1]

Inzwische (2009) sinn aus Smartphones Kleecompjuter worre, uf die ma e Vielzahl vun Progromme uffspiele konn. Hardwaremässisch verfischen alle ach iwwer winzische Kameras fer Fotos und Filme. Neiere Smartphones erlauwe ach des Surfe im Internet.

Viele verfische ach iwwer des Sadeliddenavigationssystem GPS, so dass ma in Kombination mit elektronische Karde ach soin geographische Standpunkt feschtstelle un sisch soin Wesch weise losse kann.

Die Oigawe kann de Nutzer tippischerweise iwwer e winzische Zahle- un Buchstawwetastadur, zum Deel ausklappbar, odder iwwer en berihrungsempindlische Bildschirm, uff Englisch en Touchscreen, mache.

Newwee dem kleene Bildschirm, de beschränkde Leischdungsfähischkeit vun Prozessor (Reschenoiheit) un Informationsspaischer, is die schwierisch Oigab de Hauptnochdeel vun em Smartphone. Vun viele gschäzd wern se, wail ma mit em kleene, leischde Geräd, faschd iwweral unnerwegs elekronische Nochrischde empfange un versende kann un e rieschische Meng vun Informatione mit sisch fihre odder iwwers Mobilfunknetz ausm haimische Compjuter odder em Internet beischaffe kann.

Fer der Iwwerspiele vun Informazione verfische moderne Smartphones oft iwwer Funksignale odder Infrarotsignale wu vun viele Compjuder empfange werre kenne, wie Bluetooth.

Contents 1 Verwandt: PDA, Netbooks, Notebooks 2 Bedriebssysteme 3 Herschdeller 4 Enzelnochwais

[edit] Verwandt: PDA, Netbooks, Notebooks

Die Compjuderfunktione vun Smartphones ähneln denne vun sogenannde Personal Digital Asisstants (PDA) oder Daschecompjuder also Kleenschdcompjuder, die ma in ennere Hand halde un mit de annere bediene kann. Ma kennt Smartphones inzwische ach e Kreizung von modermem Multimediahandy mit em Daschecompjuder/PDA nenne. Wail die Addition vun Mobiltelefon zu PDA des kaum schwerer und greeßer macht, awwer de kommunikative Mehrwert groß isch, henn Smartphones die raine PDA's prakdisch abgelest.

Die Lick zwische Smartphones als de akduelle mobile Klenschdcompjuder und de Notebooks, mobile uffklappbare Personal Compjuder mit vollwertiger QWERTZ-Tastatur und großem Bildschirm, hodd die Firma ASUS mit de sogenannde Netbooks gschlosse. Da die Oigab lengerer Texde iwwer en Touchscreen odder e Kleenschtasdadur uf Dauer ach fuzzelisch is, Bildschirme vun Smartphones fer lengere Lesestunde odder zum Betraachde vun Bilder im Internet doch ach klee sinn, Notebooks awwer arg schwer, gabs en Bedarf fa e Zwischeding. Des sinn die Netbooks mit Bildschirmgreße vun 8 Zoll oder 9 Zoll (22,9 cm) bis meischd 10 Zoll (25,4 cm) Bilschirmdiagonale. Notebooks fange degesche bei 14 Zoll (35,6 cm) a . Besonders heifisch sind 15 Zoll (38 cm), 17 Zoll (43,2 cm) und die Greße reischen bis 18,4 Zoll (46,7 cm). ^[2] Während Handys meischd zwische 80 und 160 Gramm wiesche, lischen Netbboks zwische 600 und 1600 Gramm.

[edit] Bedriebssysteme

Da Smardphones heid ach kleene Compjuder sinn, verfische se ach iwwer e Betriebssystem. Ma konn also newwe de e zum Lifferumfang geherende Programme nur solsche Programme nutze, wu fer des Betriebssystem gschriwwe odder angepassd sinn.

Wischdische Betriebsysteme vun Smartphones sin:

• Symbian
• RIM Blackberry OS
• Windows Mobile
• iPhone OS
• Linux OS
• Palm OS
• Palm webOS
• Android

[edit] Herschdeller

Große Herschdeller vun Smartphones sin unner anerem:

• die kanadisch Firma Research in Motion (RIM) mit ihre Blackberry-Serie, die urspringlisch speziell fer Gscheftsleid entwickelt worre sin.
• der US-Compjuderkonzern Apple mit soine iPhones mit bsonders eefacher Touchscreenbedienung
• de finnische Handyherschdeller Nokia mit soine N-Serie
• de koreanische Samsung-Konzern
• SonyEriccson
• die taiwanesisch Firma HTC
• de US-Herschdeller Motorola
• de US-Herschdeller Palm
• Handspring

[edit] Enzelnochwais

1. ↑ J. Schneidawind: "Big Blue unveiling", USA Today, November 23, 1992, Seite 2B
2. ↑ Karl Gerhardt Haas: Netbook oder Notebook?, connect 1/2009, Seiten 34-37