Wp/pfl/Pirminius
From Wikimedia Incubator
Pirminius, urschpringlisch Primenius odder Priminius,[1] (* um 670; † 3. November 753 im Kloschder Hornbach) war e Kloschdergrinder unn Heilischer. Er is de Patron vun de Palz, vum Elsass, vun de Insel Reichenau unn Schdadtpatron vun Innsbruck. De Nome vun Bärmesens un die Familienome "Pirmann" un "Pfirrmann" komme vun ihm.
Contents |
[edit] Soi Läwe
Ma wäs net, wo'rer her kòm. Die Hischdoriger männe, er kennt aus Irlond, Siedweschd-Gallie odder aus Paris geschdommt honn. De heilische Pirminius gilt als der Glauwensbot vum siedweschdeitsche Raum un vum Elsass. Er war enner vun de Wonnermönche, wo im fränkische Reich de chrischtlische Glawe gepreddicht honn un es kärchliche Läwe nei organisiert honn. No de Velkerwonnerungszeit hat's nämlich unner de Fronke noch viel Leit gäb, wo Òhänger vun vorchrischdliche Relischiòne ware. De Pirminius hat im Ufftrach vun de Karolinger gehonneld, schbeziell vun denne ihrm Hausmeier Kall Matell.
Ennie vun soine wischtigschde Tätischkeite war die Grindung vun Kleschder, denne er die Ordensreschel vum Heilische Benedikt vun Nursia gäbb hat und wo vun zentraler Bedeitung fa die Glauwensverkindischung in de jeweilisch Geschend wor sin. Pirminius kommer als Vorleifer vum Reformabt Benedikt vun Ariane vaschdehe, der wo 817 alle Kleschder im fränkische Reich enner benediktinische Uffsischd unnerschdellt hat.
724 hat er es Kloschder Mittelzell uff de Bodenseeinsel Reichenau uffgebaut, donn noch mehrere Kleschder zwische Schwarzwald un Vogese, wie Gengebach, Murbach, Weißenburch, Maursmünschder un Neiweiler. Um 730 hatter die erscht Kerch bei Murrhardt errischdet. Er hat es Kloschder Schuttern erneiert. Zuletscht hatter 742 donn es Kloschder Hornbach bei Zwääbrigge uffgebaut, wo'rer donn 753 a geschdorb un begrab wor is. Soi Reliquie sin no de Ufhebbung vum Kloschder Hornbach während de Reformazion zuerscht 1573 no Schbeyer und 1588 no Innsbruck gebrung wor.[1] Nodemm ma 1953 soi Grab widder entdeckt hat, sin e Däl vun de Reliquie zurickgäb wor. Sie sin heit in Hornbach, Schbeyer un Bärmesens.
Heit häse es Schdudiehoim St. Pirmin, e Buwe-Internat in Dòhn un de katholische Kollech St. Pirmin in Sasbach, awwer a Parreie un Kärche in Godromschdä un in Bärmesens soi nome.
In ennrer Metzer Hondschrift vum End vum achde Johrhunnerd wärd Pirminius schun als "Sanctus", also als Heilischer, bezeichnet.
[edit] Werge
- Scarapsus, (Ursmar Engelmann: Der heilige Pirmin und sein Pastoralbüchlein, eingeleitet und ins deutsche übertragen. Sigmaringen 1976)
[edit] Lideradur
- Michael Görringer: Pirminius – Geschichte des linken Rheinufers vorzüglich der bayerischen Pfalz … besonders die Einführung, Verbreitung des Christentums. Wahrburg, Zwäbrigge, 1841
- Ursmar Engelmann: Pirminius: Mönch, Bischof und Missionar, Benediktinische Monatschrift 29 (1953), 452-459.
- Arnold Angenendt: Monachi peregrini; Studien zu Pirmin und den monastischen Vorstellungen des frühen Mittelalters. Münche 1972 ISBN 3-77050-605-7
- Hans Ammerich: Hl. Pirminius. Sadifa Media, Kehl om Rhoi 2002. ISBN 3-88786-183-3
- Richard Antoni: Leben und Taten des Bischofs Pirmin – die karolingische Vita . Mattes, Heidelberch 2005. 2. erw. Aufl. ISBN 3-930978-82-2
[edit] Änzelnoweise
- ↑ 1.0 1.1 Hans Ammerich: Pirminius: Vor 1.250 Jahren: Der pfälzische Glaubensbote Pirmin stirbt in Hornbach. Bezirksverband Pfalz
