Wp/pfl/Bärmesens

From Wikimedia Incubator

Bärmesens is e kreisfrei'i Schdadt Rhoilond-Palz, Deitschlond. Sie is Verwaltungssitz vum Londkräs Siedwestpalz, vun dämm se a umschloss is, un leit om Westrond vum Pälzerwald. Ihr Nome geht uff de heilische Pirminius zurick, der, wo es Kloschder Hornbach baue geloss hat.

Bärmesens hat mer longi Zeit die deitsch Schuhmetropole genennt. Awwer mittlerweil wern in Bärmesens bei weidem nimmi so viel Schuh gemach, wie in de beschde Zeide.

Contents 1 Geographie 1.1 Schtadtgliederung 1.2 Klima 2 Geschichte 2.1 Bis 1900 2.2 Seit 1900 2.3 Inwohnerentwicklung 3 Bolitig 3.1 Schdadtrad 3.2 Boiemäschder 3.3 Partnerschdädte 4 Kultur und Sehenswürdigkeiten 4.1 Muse'e 4.2 Bauwerge 4.3 Nadurdenkmäler un Parks 4.4 Schbord 4.5 Bildung 4.6 Vereune 4.7 Regelmäsische Veròschdaldunge 5 Werdschaft un Infraschdrukdur 5.1 Wertschaftstrends 5.2 Messeschdondord Bärmesens 5.3 Vakehr 5.4 Òsässische Firme 5.5 Medie 5.6 Freizeit- und Sportòlache 6 Sunschtisches 7 Einzelnachweise 8 Literadur 9 Weblinks

[edit] Geographie

Im Oschde, wie gesaat, de Pälzerwald. Im Weschde vun Bärmesens leit die Schdadt Zwääbrigge unn de Saar-Palz-Kräs. Im Norde leit die Schdadt Lautre un de Londkräs Lautre. Im Nordoschde grenzt de Londkräs Derkem ò. Im Oschde leit de Kräs Siedlichi Woischtroß un im Siede die Grenz zu Fronkreich mit de Départments Moselle un Bas-Rhin.

[edit] Schtadtgliederung

Die Kernschdatd is in acht Dääle gegliedert. Alles ògefong hat's emol om Horeb, donn gäbbt's noch de Kerschberch, es Winzler Verdel, de Schache un die Huschderheh. Außerum leit noch im Norde de Summerwald (hat mol Moler-Birgel-Siedlung gehäß), im Siedoschde die Ruhbonk un im Weschde de Erledeich un de Weißhof. Außerdäm gäbbts noch so e paar klännere Verdelscher, wie die Hohneruh oder die Parkwaldsiedlung.

Donn gäbbts noch siwwe Ordsbezirke: Erlehof, Fehrbach, Gerschbach, Hengschberch, Niedersimde, Winschberch un Winzle. Des sinn mol selbschdännische Derfer gewässt, die donn ingemeindet wor sinn. Seitdämm honn se schdatt em Boiemäschder e Ordsvorschdeher. Die Aufgabe vum Gemänerad hat de Schdadtrad Bärmesens iwwernumm, awwer e bissel mitredde derf a de Ordsbeirad noch. Frier ware a mol die Huschderheh un die Ruhbonk eichene Derfer, awwer e Ortsvorschdeher odder e Ordsbeirad honnse nät behall.

[edit] Klima

Es gäbbt relativ viel Niederschläch, des leit im owwere Värdel vun Deitschland: On 77% vun de Messschdatzione vum Deitsche Wedderdienscht sin die Werde niedrischer. Am druckenschde isses im Abril, om meischde Niederschlach gäbbt's im Dezember, nämlich 1,4 mol so viel. Insgesomt sin die Niederschläch aber ziemlich gleichmäsich iwwers Johr verdält. Nur bei 8% vun de Messschdazione gäbbts wännischer johreszeitliche Schwonkunge.

[edit] Geschichte

Do gäbbts e extra Artiggel: Geschicht vun de Schtadt Bärmesens

[edit] Bis 1900

Bärmesens is 860 zum erschde mol in ännre Urkunde erwähnt wor, un zwar als „pirminiseusna“, des war e Siedlung wo zum Kloschder Hornbach geheert hat. De Nome kommt vum Heilische Pirminius, der des Kloschder baue geloss hat.

Em Londgraf Lui IX. vun Hesse-Darmschdadt hats im Jachtschloss vun soim Vadder in Bärmesens so gut gefall, dass er de Siedlung 1763 die Schdadtrechte gäb hat un soi Residenz doher verlet hat. Er hat in Bärmesens e Garnison uffgebaut, weil er im elsässische Buchsweiler kä bewaffnede Soldade schdationiere gederft hat. Die Schdadt hat e Schdadtmauer kriet, e Schloss, e Exerzierplatz un die grescht Exerzierhall in Euroba no der im russische Sonkt Pedersburch. ^[1] Als de Londgraf 1790 geschdorb war, hat ma die Garnison uffgelest un Schluß war mit de kurze Blied vun de Schdadt. Die Fraue honn dann ògefong, zuerschd aus de alde Uniformreck, Schdoffschlabbe zu nehe. Des war de Òfong fun de Schuhschdadt Bärmesens.

1793 honn die Preiße un die Braunschweicher die fronzesisch Moselarmee in de Schlacht bei Bärmesens besiecht. Trotzdämm is Bärmesens vun 1793 bis 1815 on Fronkreich gefall. Dodenoh is die Schdadt mit de iwwrich Palz zu Bayern komm.

[edit] Seit 1900

Die Encyclopædia Britannica aus'em Johr 1911 schreibt unner'm Stichwort "Pirmasens":

"Schdadt in Deitschlond, in de bairische Palz; 40 Meile westlich vun Schbeyer, 34.002 Inwohner (1905), on de Eisebohnlinie vun Biebermiehl. Die änzische bemerkenswerde Gebeide sinn es Rodhaus un die evangelisch Hauptkerch, in der e schänes Denkmal vun Lui IX (geschd. 1790), em Londgraf vun Hesse-Darmschdadt is. Hauptinduschdrie is die Produktion vun Schdiwwel un Schuh, awwer es werre a Mussiginschdrumende, Lädder und Maschine gemach."

1923/24 honn pälzische Separatischde vasucht, in Bärmesens dauerhaft Fuß zu fasse, sinn aber om 12. Februar 1924 gescheidert: Es Bezirksomt, de Sitz vun de Schdadtregierung, is vun de Bircher geschdirmt wor. Es hat uff beide Seide etliche Dode gäbb.

Om 9. November 1938 is die Synagog während de Novembepogrome zerschdert wor. Heid gäbbt's dort e Gedenkdafel in de Synagogegass. Bei äm erschde alliierde Bombeògriff om 9. Auguschd 1944 sin e Haufe Leit geschdorb. Om 15. März 1945 hat's e zwätti Bombardierung gäb, bei der die Inneschdadt praktisch komplett kabuttgeschmiss wor is. Acht Da schbeder, om 22. März 1945 sinn donn omerigònische Truppe in die Schdadt inmarschiert, domit war fa die Leid de Zwätte Weltkriech vorbei.

1946 is Bärmesens zum neie Bundeslond Rhoilond-Palz komm. Mit de rhoilond-pälzische Verwaltungsreform sinn 1969 de Erlehof, Fehrbach, Hengschberch, Niedersimte und Winzle ingemoindet wor, 1976 sinn dann noch Gerschbach un Winsberch dezu komm.

1989 hat die Fachhochschul Lautre in Bärmesens e Schdandort eröffnet. 1997 ware die US-Truppe, die seit'em Kriech do ware, fascht vollschdändich vun de Huschderheh abgezo.

[edit] Inwohnerentwicklung

Johr Inwohner 1620 235 1657 40 1661 87 1667 74 1681 56 1722 245 1741 225 1790 9.000 1801 3.921 1863 7.097

Johr Inwohner 1875 10.136 1890 21.041 1896 30.194 1925 42.996 1933 47.221 1939[2] 58.848 1950 49.676 1970 57.773 1987 47.997 31. Dezember 1998 46.425

Johr Inwohner 31. Dezember 1999 45.773 31. Dezember 2000 45.212 31. Dezember 2001 44.822 31. Dezember 2002 44.367 31. Dezember 2003 43.971 31. Dezember 2004 43.637 31. Dezember 2005 44.137 31. Dezember 2006 43.456 31. Dezember 2007 41.875 31. Dezember 2008 41.358

Ä Grund fa de Rickgong vun de Inwohnerzahl seit 1970 war de Abzuch vun de omerigònische Schdreitkräft. Awwer a die Aldersschdrugdur un de Mongel on Arweitsblätz tran dodezu bei.

Ma siet a deitlich, wie schdark sich des ausgewirkt hat, als de Lui IX. im achzehnde Johrhunnerd seu Residenz do gehatt hat.

[edit] Bolitig

[edit] Schdadtrad

De Schdadtrad in Bärmesens beschdeht aus 44 Radsmidglieder, die bei de Kommunalwahl om 7. Juni 2009 gewählt wor sinn.

Sitzverdälung:^[3]

CDU	36,6 %	-9,4	16 Sitze	(-5)
SBD	23,8 %	+2,5	12 Sitze	(+1)
FWG	12,6 %	+1,8	6 Sitze	(+1)
REB	6,2 %	-4,0	3 Sitze	(-2)
LINKE	5,7 %	+3,1	2 Sitze	(+2)
FDB	5,6 %	+3,1	2 Sitze	(+2)
Griene	5,4 %	+1,1	2 Sitze	(=)
NBD	1,5 %	+1,5	1 Sitze	(+1)

[edit] Boiemäschder

• Dr. Bernhard Matheis (CDU), Owwerboiemäschder
• Peter Scheidel (CDU), Boiemäschder
• Michael Schieler (pardeilos), hauptomdlicher Beigeordneter
• Helga Knerr (FWG), ehrenomtlichi Beigeordneti

[edit] Partnerschdädte

Mit'm fronzesische Poissy werd seit 1965 e Schdädtepardnerschaft gepflecht.

[edit] Kultur und Sehenswürdigkeiten

[edit] Muse'e

• Es Dynamikum im alte Rhoibäer is e Technikmuseum zum Mitmache
• Die Galerie mit Werke vum Bärmesenser Moler Hoinrich Birgel
• Die Hugo-Ball-Sommlung
• Es Schereschnittkabinett vun de Emmler Lisbeth
• Es Schuhmaschinemuseum
• Es Schuhmuseum
• Es Weschdwallmuseum in Niedersimde

[edit] Bauwerge

• Alter Friedhof mit Caroline-Saal (ehemalichi Leichehall, benonnt noh Londgräfin Karoline, awwer mit C sieht's vohrnähmer aus)
• Ehemalichi Könichlich-Bayrischi Kraftposchd (irchend wonn soll's mol e Museum un Veranschdaldungsord gäwwe)
• Unnerer Schloßplatz mit aldem Radhaus
• Schuschder-Brunne
• Nei'i Schloßdrepp mit Schlossbrunne un em Schdier
• Ehemalichi londgräflichie Garnisònskärch (proteschtantischi Luther-Kärch)
• Exerzierplatz ("Exe") mit Neiem Radhaus
• Neiffer om Park (ehemalichi Schuhfabrik)
• Poscht-Dreieck (e paar Heiser aus de Grinderzeit)
• Rhoibäer (ehemalichi Schuhfabrik, do drin is es Dynamikum un verschiedenes onneres)
• Feschdhall (Theadersaal fa verschiedene Veroschdaldunge)
• Johanniskärch
• Gebäude vun de ehemalische "Bayrische Schdaatsbonk"
• Die Schdreckbrick zwische Schache und Winzler Verdel is so e bissel es Wohrzeiche vun de Schdadt.

On de Zufahrsschdroße in die Schdadt un in de domolische Außebezirke vun Bärmesens schdehe noch e paar schäne Wòhnheiser aus de Grinderzeit (Zwäbrigger Schdroß, Londauer Schdroß, Lembä'er Schdroß, om Alde Friedhof). Im Zwätte Weltkriech is awwer viel kabutt gong, die gonz Inneschdadt war in Trimmer gelä. Aus em 18. Johrhunnerd gäbbt's noch e paar sogenonnde Grenadierheiselcher, wo die Lui IX. fa soi Soldate hat baue losse. Noch älder is eigendlich nix, Bärmesens wa dodevor jo nur e klännes Baurekaff.

[edit] Nadurdenkmäler un Parks

Zu de greßere Parks in Bärmesens gehere de Alde Friedhof, der zum Park umgewidmet wor is, nodämm de Waldfriedhof uffgemach wor war. Die frieher Insechnungshall werd inzwische als Carolinesaal fa kuldurelle Veròschdaldunge genutzt. De Neiffer-Park is vum Neiffer Emil näwer soiner Schuhfabrik ogelet wor, es schdehe viel alde Bäm drin. De Schdreckdalpark is entschdonn, als ma sich fa die Londesgadeschau 2000 beworb hat. Aus der is zwar nix wor, awwer ma hat es Gelände vun enner alde Gerwerei mol widder in die Reih bringe känne. Jetzt is e gonz netter Park entschdonn, wo a fa Kinner un Juchendliche viel gebott is. Om Eisweiher gäbt's a noch e bissel Freizeitgelände, wo ma schbaziere gehe konn, un Kinnerschbielblätz un e Schbortplatz gäbts do a. Außerdem kommer Minigolf do schbiele. De Eisweiher hat ma mol ògelet, damit die Brauereie im Winder Eis hacke un inlachre gekennt hon, des ma im Summer gebraucht hat, um beim Braue es Bier zu kiehle. De Schdadtwald owwerhalb vum Eisweiher is jetzt net direkt e Park. Aber im dem Waldschdick gäbt's a euniches mit Erholungswert. Schbazierwege nadierlich, interessonde Felsformatione, de Waldlehrpad, e Schbielblatz fa die Kinner, un ab un zu sieht ma a mol e paar Rehe, wonn a nätt grad om Schbielblatz.

[edit] Schbord

Es Aushängeschild vum Logalschbord is de FK Bärmesens. No'm Kriech waren'se ziemlich gut, honn a schunn e mol gonz vorne mitgeschbielt. Zwischedrin hat's eher e bissel bescheiden ausgesieh, ma war dann a mol in de Londesliga, awwer jetzt is ma in de Owwerliga Siedwest widder gonz gut debei.

[edit] Bildung

Bärmesens is jo e Middelzentrum vum Londkräs. Es hat drei Gymnasie: Es Hugo-Ball-Gymnasium (frieher Neischprachliches Gymnasium), es Immònuel-Kont-Gymnasium (frieher Altschprachliches Gymnasium, noch frieher seit 1836 die Ladoinschul) un es Leibniz-Gymnasium (frieher Owwerrealschul). Awwer ma konn a on de Berufschul soi Werdschaftsabi oder Technisches Abi mache. Außerdämm gäbbt's die Deitsch Schuhfachschul. Dezu komme acht Grundschule, drei Hauptschule, e Duali Owwerschul, e Realschul un de Sonnerschul Matzeberch. Seit 1989 gäbt's a e Ablecher fun de Fachhochschul Lautre.

Die Erwachsene kenne sich a bei de Volkshochschul weiterbilde.

[edit] Vereune

• Aero-Club Bärmesens
• 1. Carneval-Vereu Bärmesens, CVP
• 1. Mountain-Bike-Club Bärmesens e.V.
• Knubbe un Knode, Vereu fa alte Hondarbeitstechnike (Die honn iwrichens gar kä hochdeitscher Nome!)
• Oratoriechor Musikvereu Bärmesens
• Bezirgskontorei Bärmesens
• Donzclub Silwercasino e.V.
• Schdadtfeierwehrverband Bärmesens e.V.
• CVJM Bärmesens
• Wertschaftsjuniore Bärmesens-Zwääbrigge
• Pfadfinnergrupp e.V. Bärmesens
• VfB Poscht Bärmesens
• Turnvereu Bärmesens 1863 e.V.
• Bolizeischbortvereu Bärmesens
• Freimaurerlosch "Zur Treue om Berch Horeb" #701 AFAM
• Mount Moriah Two Bridges Nahe Lodge #823 (english speaking)
• SV 1907 Ruhbonk e.V.
• DLRG Bärmesens e.V.
• DRK Stadtverbond Bärmesens
• Photo Scene Bärmesens e.V.

[edit] Regelmäsische Veròschdaldunge

• Londgrafe-Da, zwättes Wochenend im Abril
• Open-Air-Konzerde uffem Exe (Ober, Musical, Rock, Pop, Hip Hop)
• Schlabbeflicker-Feschd om zwätte Wochenend im Auguschd
• Exe-Feschd om zwätte Wochenend im Sebdember
• Feschdiwal Euroklassic (Zusomme mit Bitsch, Zwäbrigge, Blieskaschdel un de Verbondsgemä Zwäbrigge-Lond)
• Maimarkd, Ende Abril odder Òfong Mai
• Grenadiermarkd, meischdens Òfong Sebdember,
• Novembermarkd, Ende Okdober odder Òfong November
• Belznickelmarkd, e Woihnachtsmarkd in de Adventszeit.

[edit] Werdschaft un Infraschdrukdur

[edit] Wertschaftstrends

Bärmesens war seit'em 19. Johrhunnerd es Zendrum vun de deitsche Schuhinduschdrie. Seit de 1970er Johre isses allerdings immer schwierischer wor, sich in de Masseproduktion gäe die Kongurrenz aus'em Auslond zu behaupte. Die meischde òsässische Schuhfabrigge honn zugemacht, onnere hon ihr Produktiòn ins Auslond verlachert odder sich uf Nischesegmente schbezialisiert. De Lädderhonnel, de Maschinebau un a die Chemiebranche in Bärmesens sin urschbringlisch wäe de Schuhinduschdrie iwwerhaupt erschd endschdonn, endschbrechend honn die a Probläme kriet. So sin ungefähr 15.000 Arweitsplätz verlor gong. Dann sin, als die Omerigòner abgezo sin, nochemol ungefähr 10.000 Soldade un Ògeherische fortgezo und 4.000 Arweitsplätz fa Zivilbeschäftischde sin nochemol weggefall. 2002 hat's zum Beischbiel e Arweitsloseòdäl vun 14,9% gäb.

Ma hat donn ògefong, es ehemolische Kasernegelände uf de Huschderheh und verschiedene leerschdehende Fabrigge wie de Neiffer om Park fa Neigrindunge oder a Òsidlunge vun Firme zu nutze. A im Rhoibäer is eunisches bassiert. Des war emol die grescht Schuhfabrig vun gonz Europa. Inzwische is es Dynamikum drin, die zwä Tageszeidungen Pirmasenser Zeitung' un Rheinpfalz ^{[4] [5]}

[edit] Messeschdondord Bärmesens

Bärmesens is die änzisch Schdadt in Rhoilond-Palz, wo ma internationale Messe dorchfiehre konn. De Lui Kieffer hat es Gelände ab 1949 schbeziell fa die Pirmasenser Schuh und Lederwarenmesse uffgebaud. Die is no un no de Bach nunner gong, awwer diverse Messe gäbt's immer noch. Es sin 10 Halle mit 36.000 m² iwwerdachter Fläche un 48.000 m² Freifläche inklusive Parkplätz. Außderdem gäbbt's e Kongressbereich mit 5 Konferenzräum, äm Sitzungssaal, 1.700 PKW- und 100 Busparkplätz. Es Gelände wärd a fa Ausschdellunge, Tagesveranschdaldunge, Schbordveranschdaldunge un Feschde genutzt.

Frier hat's hauptsächlich Schuhmesse gäb, zum Beischbiel die Pirmasenser Schuhmusterung (psm) un die plw (Internationale Messe für Leder, Schuh-Komponenten und mehr). Die hageha (Verbrauchermesse für Handwerk, Gewerbe und Handel, seit 1954), die Gesundheitswelt un die Kulinaria sin noh un noh dezu komm, un e paar onnere Messe mit unnerschiedlicher Läwensdauer. Es Lond gäbbt immer mol widder Geld, um em Messeschdondort zu helfe, awwer es fallt nät leicht, mit Messe erfolgreich zu sinn, un gäbbt a immer mol wieder schdadtpolidische Turbulenze.^{[6] [7]}

Seit 2005 hat ma versucht, a in onnere Schdätd Messe zu organisiere^[8]. Des war awwer net grad rentabel. 2009 hat ma deshalb alle Mitarbeiter vun de Messegesellschaft entlosse misse, weil kä Geld mä do war. Die Messe in Bärmesens wern jetzt wohl erschd mol vun de Schdadtverwaldung organisiert werre misse.^[9]

[edit] Vakehr

Vakehrsteschnisch dut sich nät besonners viel. Die B10 zwische de A8 bei Bärmesens un de A65 bei Londau wärd zwar noh und noh vierschburisch ausgebaut. Bis Rubberschwiller is ma schun komm, awwer des is wännischer wie e Verdel. Es wärd wohl noch Johrzehnde daure, bis alles ferdisch is. No Norde gäbt's die sogenonnte A62 no Londschduhl un donn weider in Richtung Trier, die awwer im Kräs nur zwäschburisch is, und die B270 no Lautre, die a net viel besser ausgebaut is. No Weschde die A8, do kommer nix sae. No Siede sinn nur Schdreselscha dorch de Wald, awwer uf de onner Seid vun de fronzesisch Grenz sieht's a net onnerschd aus.

Iwwer die 6,97 km long Stichstreck Biewermiel (Bärmesens Nord) - Bärmesens Hauptbòhnhof is Bärmesens per Eisebòhn ògebunn. Vun Bärmesens Nord geht's weider no Lautre. Uf de Biewermiel kreizt die Schdreck vun Londau no Sabrigge. Fern- und Giederverkehr gäbbt's uff dänne Schdrecke nät. Die geografische Komplikazione honn zu ennre Schtroph in em Fasnachtslied gefiert: "Zwische Bärmesens un Biebermiel, do gäbt's e Tunell, wom'mer 'rinfahrt wärd's dunkel, wom'mer 'rausfahrt wärd's hell."

Vun 1905 bis 1943 hat Bärmesens e elektrischi Schdroßebòhn gehatt, was sellemols arisch fortschrittlisch war. Vun 1941 bis 1967 dann noch Owwerleidungs-Omnibusse.

[edit] Òsässische Firme

Peter Kaiser (seit 1838) is die äldescht Schuhfabrig vun Deitschlond. Framas macht Läschde un Sohle unner onnerem fa Adidas un Nike. Profine macht Kunschschdoffpladde un -profile, unner onnerem fa Fenschder. Keck schdellt Induschdriefarwe her, z.B. fa Fußbäll. Die Park & Bellheimer, die unner onnerem aus de Parkbrauerei hervor gong is, gehert mittlerweile zu de Monnemer Eichbaum-Brauerei. Convar is e Schbezialischd fa Daterettung.

[edit] Medie

Bärmesens hat zwä Tageszeitunge, die Bärmesenser Zeitung, die es seit 1832 gäbt, un die Rhoipalz mit ihrem Lokaldäl, de Bärmesenser Rundschau. Es gäbt dann doch es Schdadtmagazin P6 un e Wochebladd. In de Schlossgalerie sitzt es Radio Pirmasens. Donn gäbt's noch de Offene Kanal, e Kabelsender mit rechionale Beiträch.

[edit] Freizeit- und Sportòlache

De Pirmasenser Luft- und Badepark (Plub) is es schdädtische Schwimmbad. Es Hallebad is 1988 komplett modernisiert wor. Uff de Huschderheh is es schdädische Schdadion, des vorwiechend vum Fussballklub Bärmesens FKP genutzt wärd. Om Eisweiher gäbt's e Schbord- un Freizeitòlach mit Schbielplatz, Bolzplatz, Minigolf, Badminton un Volleyball, denäwe de Schbortblatz om Mordloch, denne ma de Auswärdische zulieb a Spesbach nennt. De Schdreckdalpark is aus ennrer Induschdriebrach entschdonn, un ännre Bewerbung zur Londesgardeschau, aus der zwar nix wor is, awwer die Schdadt hatt deswäe de Kopp nät hänge geloss un grad seläd doch e schäner Park draus gemach. Do is e Wasserschbielplatz fa Kinner, e Skateboard-Parcours fa die greßere un a nochemol Schbielfelder fa diverse Freizeitschbordarde.

[edit] Sunschtisches

Bärmesens is ...

• de änzische internazionale Messeschdondord in Rhoilond-Palz
• es weltgreschde Schuhhondelszentrum
• Sitz vun de älteschd Schufabrig vun Europa (Peter Kaiser, gegrindet 1838)
• ähnlisch wie Rom uf siwwe Hichel gebaut (kommt halt druff ò, wie ma zehld)
• 2007 die Schdadt mit de meischde Privatinsolvenze in Deitschlond
• vor Johre die Schdadt mit de meischde Millionäre pro 1000 Innwohner in Deitschlond gewässt
• Sitz vum US-Sender "Bärmesens-Huschderheh", wo 1969 Signale vun Apollo 11 empfong un no Huston/Texas iwwertra wor sin
• zwar kä Woibauord, awwer Geburtsord vunn de ersche Pälzische Woikenischin Ruth Bachroth, gekiert 1931
• deitscher Sitz vun Convar, die no de Òschläch vum 11. Sepdember 2001 Feschdpladde vun de Computer aus de Tirm un Blackboxe unnersucht un Date rausgeläs honn

[edit] Einzelnachweise

1. ↑ Marion Dilg: Stadtportrait Pirmasens - Treppen und Schlappen, auf SWR.de
2. ↑ ¹ Volkszehlungsergebnis

   Datequell ab 1950: Statistisches Landesamt Rheinland-Pfalz

   Datequell ab 2005: Gemeindestatistik aus dem landeseinheitlichen System EWOISneu

3. ↑ Kommunalwahl Rheinland-Pfalz 2009, Stadtrat [1]
4. ↑ GIU Gesellschaft für Innovation und Unternehmensförderung mbH: Projektblatt
5. ↑ Bundesministerium für Verkehr, Bau und Stadtentwicklung: Stadtumbau West
6. ↑ Messe Pirmasens : Messe-Modernisierung macht Standort Pirmasens zukunftsfit
7. ↑ Landtag Rheinland-Pfalz: Kleine Anfrage : Verluste der Messe und Veranstaltungsgesellschaft Pirmasens GmbH
8. ↑ Messe Pirmasens: Messe weiter auf Kurs
9. ↑ Messe Pirmasens entlässt alle festangestellten Mitarbeiter In: Pirmasenser Zeitung vom 02.08.2009

[edit] Literadur

• Gerhard Gräber, Matthias Spindler: Revolverrepublik am Rhein. Die Pfalz und ihre Separatisten. Bond 1: November 1918 - November 1923. Pfälzische Verlags-Anstalt, Lòndau/Pfalz 1992, ISBN 3-87629-164-X
• Gerhard Gräber, Matthias Spindler: Die Pfalzbefreier: Volkes Zorn und Staatsgewalt im bewaffneten Kampf gegen den pfälzischen Separatismus 1923/24. Pro Message, Ludwigshafen/Rhein 2005, ISBN 3-934845-24-X (u. a. iwwer die Ermordung vun Franz Josef Heinz un de Schdurm uf's Bärmesenser Bezirksòmt 1924)
• Emil Guth, Lemberg, Dorf und Burg im Wandel der Zeit, Selbstverlach Ortsgemä Lemberch 1984
• Ludwig Kieffer, Die Bärmesenser Stadtgeschicht, Edition Tintenfass 2005, ISBN 3-937467-12-2
• Oskar Kröher, Mein Pirmasens, Selbstverlach 1994
• Heiner Kröher, Hoyner-Ziyäuner-Geschichten, Adolf-Deil-Verlag, 1989
• Heinrich Kröher, Vun de Freiheit un de Lyoner, PVA Londau 1991
• Julius B. Lehnung, Geliebtes Pirmasens, 12 Bände, Bärmesens (Komet), 1978 ff.
• Helmuth Schäfer, Geschichte der Stadt Pirmasens, 2001, Wartberg-Verlag (Buchhondlung Gondrom/Thalia)
• Oskar Schäfer, Pirmasenser Chronik, Verlag Adolf Deil, Bärmesens 1927

[edit] Weblinks

• Stadt Pirmasens
• Westwall-Museum Gerstfeldhöhe
• Pirmasens in der Encyclopædia Britannica 1911
• Radio Pirmasens 88.4
• Das Rathaus von Pirmasens