Wp/pfl/Heidelsbursch

From Wikimedia Incubator

Nochgebauder ongedaideter Oigang der Heidelsbursch aus orischinale Stee aus remischer Zait, wu vor Ord ufgfunne worre sin.

Die Heidelsbursch (hdt: Heidelsburg) bei Waldfischbach is e inzwische erloschenie befeschdischdie Hehesiedlung aus keldischer un remischer Zait. Die Heidelsbursch dere keldischer odder remischer Name net iwwerlieffert is, is gesche 50 v.Chr., also schun zu spedkeldischer Zait besiedelt worre, is in remischer Zait ausgebaud und im 4. Jahrhunert erlosche.

[edit] Gschischt

Noch de Griendung in keldischer Zait is die Siedlung in remischer Zait, vermudlisch in de Birschergriegszait des Draikaiserjohrs 68 n.Chr. erschmols widder korzfrischdisch als Befeschdischung genudzt worre.

Dann isse in de Wirre um 260 n.Chr. als Siedlung ausgebaut worre un dann 275 n.Chr. widder verlosse worre.

Um 330 n.Chr. is erneit gebaut worre vor allem die Abschnittsmauer zur Sischerung vum Plateau.

[edit] Grabstee des Waldfischbacher Forschdbeamde

Der Saltuarius und seine Frau (Kopie einer Grabplatte)

In die Mauer sin viel Steebleck vun Grabdenmeler ausm 2. un 3. Jahrhunnert n.Chr. verbaut worre. Dodezu ghert ach de Grabstee vun em Forschdbeamde (remisch saltuarius), Publius Tertius, un soiner Fra. Als Symbol vun soiner Amtsgewald als Ferschder treschd e kleeni Axt. Bekleided isser mit em gallische Kapuzemandel. Im em Hordfund in de Heidelsbursch ausm 4. Jahrhunnerd is so e Werkzaisch im Original gfunne worre. Die Axt is en sogenande Harzreißer, des ma zum Gewinne vun Boomharz verwend hot. Die Fraa treschd e gstufdes, tunikaartisches, fußlanges Gewand. In de linke Hand treschd se e sogenantes Bersearmband.

[edit] Hordfund

Zu em um 352 dord verborschene Hort aus Medallgescheschtänd geheren newe de erwähnte Reißaxt, Radnawe, e Pann, en Dreifuß, en Sens, e Pflugschar, e Seche, Schofschere, Weideglocke, Äxt, Leffelbohrer un sechs Medallkemm zur Texdilverarweidung.

[edit] Ende

Dursch de große Alemanneoifall im Spädsummer 352 is die Heidelsbursch unmiddelbar betroffe worre un schbäder nemmer besiedelt worr.

[edit] räumlischi Zuordnung

Ma vermud, dass des Schwarzbachdal um die Heidelsbursch noch zur remische Provinz Germania Superior ghert hot un domit zum Verwaldungsbezirk der Civitas Nemetum also der Gebiedskerperschaft um Noviomags, dem heidische Speyer.

[edit] Quelle

• Hauptquelle fer den Ardikel is: Helmut Bernhard: Die "Heidelsburg bei Waldfischbach - Ein kaiserlicher Domänensitz (Saltus)?, in: Karl-Heinz Rothenberger, Karl Scherer, Franz Staab, Jürgen Keddigkeit (Herausgeber): Pfälzische Geschichte, Band 1, Institut für pfälzische Geschichte und Volkskunde, 2002, 2. verbesserte Auflage, Seiten 82-83

[edit] Lideradur

• Helmut Bernhard: Die Heidelburg bei Waldfischbach-Burgalben, Domänensitz und spätrömische Höhensiedlung, in Ortsgemeinde Waldfischbach-Burgalben durch den Arbeitskreis Festschrift (Hrsg.): Heimatbuch zur 800-Jahrfeier. Waldfischbach 1182-1982, Seiten 42-50
• Helmut Bernhard: Waldfischbach-Burgalben PS, in Heinz Cüppers (Hrsg.): Die Römer in Rheinland-Pfalz, 1990, Seiten 656-659

[edit] Guck a mol:

• Wp/pfl/Saltus

[edit] Weblinks

Wikimedia Commons has media related to:

Heidelsburg