Wp/pfl/Die anonyme Giddarischde

From Wikimedia Incubator

< Wp | pfl
Jump to: navigation, search

Die Anonyme Giddarischde sin e musigalischie Selbschthilfegrupp un schdammen urschbrünlich aus Frongedahl. Denne ihr Mussig heert mer mittlerweile ach außerhalb vum Dreistromland. S Dreistromland leit zwischem Fuchsbach, em Eckbach un de Isenach.

Ganz am Ofang waren se zu Dritt: de Edsel (am Gebabbl, am Singe un manchmol am schlecht rieche), de Michl (an de Hawai-Gidda) un de Roman (am Loggekopp). Seidem Konzert bei de Därgemer Feierwehr 2007 sin se zu Fünft, do sin de Kaule (an de Annerschtrum-Gidda) un de Stebbes (an de Drumml) dezukumme. De (Schorle) Mischer an de Kneppscher is de Grosse aus Eppstä.

Contents

[edit] Diskografie

De Produzent is de Hoffmanns-Dirk ausem Dreistromland, un insgsamt hän die Anonyme bis heit 6 Konserve (CD's) rausgebrocht :

  • 1. Feierowend
  • 2. Hausmacher
  • 3. DSL
  • 4. Palzlied
  • 5. Alles weil mer Pälzer sin (dobbl-laiv-CD)
  • 6. Vaddedag

[edit] Lieder

Die wohl zwee bekannschde Lieder sin :

  • Palzlied (warscht Du ämol uff de Kalmit odder uff de Dahner Heh)
  • Lewwerworscht (kumm schdoß mol uff moin Schatz, ich riech die Lewwerworscht so gern)

Die Texde vun de Anonyme-Lieder sin ausem kläne Pälzer seim Lewe gegriffe (die dreggisch Wäsch mol uffen Haufe – sieht glei ganz annerscht aus) un en jeder (odder jedie)find sich dodrin widder.

[edit] Weideres

Im Johr 2010 feiern die Anonyme ihr 10-jährisches Beschdehe, obwohls do Leit gebt, die saachen, dasse schun ä Johr friejer zamme gewese wärn....

Beim Werner Rohr an de Grundschul im Kläkallbach lernen die Kinner im Mussigunnerricht s Palzlied, dodriwwer hot die Judith Kaufmann vum SWR-Fernseh neulich ach en Bericht gemacht.

Seit e paar Johr sinn se als beim Literarische Friehschobbe uffem Därgemer Worschtmarkt debei, ansunschde hänn se e paar Lokalitäte, wu se ach reglmäßisch jedes Johr debei sin: bei Schreier un Kohn in Großkallbach odder beim Langewalder in Weisrem am Sand.

Als Fan vun de Anonyme isses übrigends e Muss, s grüne Tieschört middem Palzlogo azuhawwe – awwer uffbasse: do gebts ach gefakte Tieschörts im Indernett. Un mer muss immer e Dutt voll Korke debei hawwe, weil nämlich beim Lied "Flieg-kläner Korke-flieg" beim Refrää die Fäns Korke uff die Biehn nuffschmeiße dun. Inseider wissen, dass die allererschde Korke vun de Speyergirls (des is die Annika un die Schaggelien) gschmisse worre sin un erscht viel, viel schbeeter Nochahmer gfunne hot.

Legendär is de "Wannerdaach", der im Jahr 2009 schun zum zwedde mol schdadtfinne dud. Beim erschde Wannerdaach in Därgem hot mer sich an de Drei Ääche getroffe. Die erscht Grupp is uff die Limburg geloffe, die zwett Grupp uff die Schneggenudl un die dritt Grupp hot vergeblich de Hammesldahlbrunne gsucht... gedroffe hot mer sich dann widder im Ebbedahl, wus dann e schänes Waldkonzert gewwe hot.

Momendan isse so, dass am Ofang vumme Anonyme-Konzert en alde Porsche-Bulldog orgle dud (nadierlich als Konserv) – des is de Ofang vun: Alles weil mer Pälzer sin... Un ganz am Schluss, wann richdisch ferdisch is, werd de Pälzer Sängergruß gsunge.

[edit] Webseide

Im Indernett gebts bei wkw mehrere Anonyme-Giddarischde-Grubbe, bei my-video, youTube u.s.w. find mer e paar Videos

un e HP hänn die Anonyme nadierlich ach: www.dieanonymegiddarischde.de un dort find mer dann ach immer wann un wuh se uffdrede dun.

Retrieved from "http://incubator.wikimedia.org/wiki/Wp/pfl/Die_anonyme_Giddarischde"