Wp/mrj/Сидушкина Анна Романовна

From Wikimedia Incubator

< Wp | mrj
Jump to: navigation, search

Сидушкина Анна Романовна – лӹымлӹы кäршӹзӹ, мырызы, композитор, педагог, Мары АССР искусствын заслуженный пäшäзӹжӹ. Тӹдӹ 1915 ин 22 январьын Микрäк вел Важйäл Митрусир солаэш шачын. А.Р.Сидушкина Микрäк велеш шачын-кушкын. А Микрäк вел солавлäштӹ перви кäршӹм цилä ӹдӹрок шактен мыштен. Шактен мыштыдымыжы шоэ веле ылын. Семняштӹжӹ цилäнок кäршӹм шактенӹт, седӹндон изи Аня шӹм иäшӹнок кäрш докы шумäнгӹн дä шакташ тыменьӹн. Музыкым яратымыжы тӹдӹм Йошкар-Олашкы, Искусство техникумыш канда, сäмрӹык ӹдӹр тиштӹ дирижереш тыменеш. Тӹнäмок А.И.Искандаровын вуйлатымы хоровой капеллышты мыра, концертвлäштӹ кäршӹм шакта. Музыкальный училищӹм тымень пӹтäрӹмӹкӹ, Москваштышы государственный консерваторин дирижерско-хоровой факультетӹн студентшӹ лиэш. Война тӹнгäлмӹкӹ, Йошкар-Олаш пöртӹлеш, Маргосфилармоништы хорышты мыраш дä кäршӹм шакташ тӹнгäлеш. 1946 ин Москваштышы консерваторим тымень пӹтäрä. Вара Йоласалышты, Марпединститутышты кäрш ансамбльвлäм цымыра, шукы и Маргосфилармони сагашы кäрш ансамбльын вуйлатышыжы лиэш. Шӹренок концертвлäштӹ шакта, республиканский, всероссийский художественный конкурсвлäштӹ ӹшке мастарлыкшым анжыкта. Тӹнäмок И.С.Палантай лӹмäн музыкальный училищӹштӹ, культпросветучилищӹштӹ хоровой дисциплиным тымда дä кäрш классым пачеш, Марпединститутын музыка, мырымы дä изобразительный искусство кафедрын старший преподавательжӹ лиэш. Тӹдӹ ӹшкежӹт мырывлäм сирен. 1958 ин «Кырык мары халык мырывлä» сборникӹм пецäтлен.

Retrieved from "http://incubator.wikimedia.org/wiki/Wp/mrj/%D0%A1%D0%B8%D0%B4%D1%83%D1%88%D0%BA%D0%B8%D0%BD%D0%B0_%D0%90%D0%BD%D0%BD%D0%B0_%D0%A0%D0%BE%D0%BC%D0%B0%D0%BD%D0%BE%D0%B2%D0%BD%D0%B0"