Wp/lus/Zodi Rimawi Pawl

From Wikimedia Incubator
< Wp‎ | lus
Wp > lus > Zodi Rimawi Pawl

Zodi Rimawi Pawl, Zodi ti maia hriat làr zâwk hi Barmarama mizo ṭhalai rimawi thiam inhläwm khâwm rimawi pawl, kum 1970 chhova din a ni a. Mizo rimawi khawvêla sülsutu pawimawh berte zinga mi leh Zofate chènna pumpui huapzo rimawi pawl hmasa a ni.

Golden Nghapih[edit | edit source]

Kum 1970 chho khan Barmarama mizo rimawi ngaina mi ṭhenkhatin hming invuah hran lovin rimawi pawl an din a. Hming invuah hran lo mah sé mi ṭhenkhatin 'Shwe Ngapih' an lo tihsak a, chu chu "Golden Nghapih" tihna a ni. Hetih lai vel hian Zoram khawvela lar chhuak ta T. Zorampela chu Mandalay-a lehkha a zir lai a ni a. Mandalay-a a lehkha zir zo Tahana a let leh chuan tih tak taka zaiho a rawt a, kum 1975 khan Zodi hi an din ta a ni.

A tìra Zodi inremphung chu hetiang hi a ni:

Hming Zodi Rimawi Pawla chanvo
T. Zorampela Lead Guitarist
Lalthankima Second Lead Guitarist
Thangvêla Rhythm guitarist
Ramthanmawia Bassist
Lalhmingthanga Drummer
Lalhlunmawii, Lalenkawli, Thangluaia, Thanghlira, Lalhlima Záipú/Záipíte

Ramthanmawia (Papuia) hi Zarkawt Aizawla Akai dawr neitu ṭhin, MNF ticket-a Lungpho biala ding ve ta kha a ni. Zodi album hmasa ber Damlai Pialral bakah kha chuan a tel chhunzawm ta lo. A tìra an pawla tela kan ziah chhuah te hi Damlai Pialral album-a part neiho chauh kha an ni a. Anni lo pawh hi member eng emaw zat an la awm. Sap hla leh Burmese hla an sa-ho ṭhin a, Zorampela chuan, "Khangho kha chu Mizo ni tho mah se, sipai fate an ni a, an Mizo ṭawng lamdàn a dik lo deuh a, Mizo hla an sa ve ta lo. An zingah khan aw tha deuh deuh an awm," tiin a sawi.

Sulsutu album[edit | edit source]

Kum 1977-ah khan album hmasa ber Damlai Pialral an tichhuak a. Mizo rimawi album hmasa ber dawttu nia hriat a ni. Hemi hma hian kum 1976-ah Tahan Band tho, Vulmawi chuan an album hmasa ber 'Raldawna leh Tumchhingi' an lo tichhuak tawh a, a páwl din kum azáwng chuan Zodi a hmasa zawk a, Vulmawi hi kum 1976-a din a ni. Damlai Pialral album an buatsaih lai hian Zodi hian sum leh paia hlawkna an beisei lova, an khaipa Zorampela chuan, "Hlawk chu sawi loh, chawi belh pawh kan inhuam hial a ni," a ti. Hloh inring sa chungin khawchhak lama Mizo chëngte chuan Zofate chu kum 30 chuang kal ta khan rimawi khawvelah bung thar an kaipui ta a ni.

Technology tlàn khalhin[edit | edit source]

Tunlai technology kan la ban phak hma khan Zodi chuan album tha tak an lo sual chhuak tawh a, tun hnua han ngaihthlak erawh chuan a recording technology that tawk lohzia hi a hriat a, a music composition leh a melody erawh a hliah khuh zo lo.

Zorampela chuan, "Mandalay-a kan record a ni a, Four track recording a ni. Vocal leh backing vocal ten mike pakhat an inṭâwmte a ngai a. Overdubbing theih a ni lo a, tunlai nen khaikhin chuan lei leh van ang a ni," a ti. Chu mai chu a la ni lo, studio hman man an neih daih loh avangin hun tlem thei ang ber hman a ngai a. Damlai Pialral album hi ni khat leh chawhma chhungin an record zo vek a ni. Beng tikham deuh lai pawh han siamṭhat leh theih chi a ni lova, an vawikhat record kha an ring nghal zel a.

Sülhnû[edit | edit source]

Album pathum (Damlai Pialral, Phengpheleng leh Rosepar, Chingal Saum/Chun Leh Zua ) an buatsaih hlawhtlin hnuah hun eng emaw chen chu an la zaiho zel a, Aizawlah ngei pawh concert ngaihhlut hlawh em em an nei leh a. Mahse Zodi member-te chuan vanglai chen reng thei ta bik lovin, nupui pasalte an nei ta fer fur a. Mahni seh seh mualah, tiin Zorimawi khawvela an sulhnute chu nakin, vanglai pelh huna lungleng khawhara la thlirlet leh mai tawh turin an ṭin darhsan ta thliah thliah a.Chuailopari chu chuai ve thei tawh ngai dawn lo mahse, a satu leh remtu mihringte erawh, thlalak hlui leh cassette hluiah bak an kim ngai ta lo. Duhaisam satu Thanghlira pawh hi kum 57 mi vel niin kum 2010, ramtuk thla khan Zokhawtharah a lo boral tawh bawk a ni.

Thulâkna[edit | edit source]

  • CFL, ZODI Thangvela Sunna, misual.com thuziak[[1]]
  • ZOLife chanchinbu, kum 2011, ṭau thla chhuak.