Wp/lld/Union europea
From Wikimedia Incubator
L'Union européa ie n'union sëuranaziunela y anterguviernativa de 27 stac mëmbri independënc democratics européesc. L'Union européa ie la majera cunfederazion de stac independënc a livel mundiel, crieda sota chëst inuem dl 1992 tres l tratà sun l'Union européa (Tratà de Maastricht). Per n grum d'aspec ejistova l'Union bele dan chësta data tres na sfilza de relazions predezessëures, pian via dal 1951.
Al mumënt à l'Union européa n marcià chemun unich, fat da n'union duanela, na munëida unica dirijeda da la banca zentrela européa (adurveda per l mumënt da 14 di 27 cumëmbri), na politiga agricula chemuna, na politiga de cumerz chemuna y na politiga chemuna de pëscia. Na politiga furesta y de segurëza chemuna dëssa vester l segond pilier di trëi piliers dl'Union européa. La cunvenzion de Schengen à abolì l cuntrol dl passaport y l cuntrol duanel per n valgun stac dl'Union, crian na lerch de mobilità chemuna per la vita, l lëur, i viages y l'investizions di sentadins dl'UE.
L'istituzions dl'UE plu impuratantes ie l Cunsëi dl'Union européa, la Cumission européa, la Chëurt européa dla Justizia, l Parlamënt europée, l Cunsëi europée y la Banca zentrela européa.
