Wp/lld/Ujöp Freinademetz
From Wikimedia Incubator
Sant Ujöp Freinademetz (聖福若瑟, Shèngfú Ruòsè per cineis) é nasciù su Oies a San Linert (Badia) ai 15 d’auril 1852. Al fova l cuart de tredesc mutons de na familia da paur dret religiousa. Na fede viva y n amour sinzier al proscim, che al ova emparé a ciasa, é la fondamenta per sia cherdeda. Ti agn che al studiova a Persenon él vegnù brancé da la parola dla Scritura che al ova audì te na perdica: „Al é i mutons che svaia do pan, ma al n'é degugn che ti l romp“ (Lamentazions 4,4); al audiva chestes paroles sciche n scrai di mutons pagans do la verité y la grazia dla fede cristiana; chesta esperienza é deventeda per Ujöp la semenza che é sfioreda su, tolan a cuer la cherdeda de jì tles miscions.
Ai 25 de messel 1875 él vegnù consacré preve y é ruvé caplan a San Martin. Ai 11 d’aost 1878 àl tegnù dailò sia perdica de comié y é ju tla ciasa miscionara de Steyl, permò fondeda trei agn denant, y é deventè un di doi prums anunziadours dl vagnele dla congregazion miscionara.
Da d'aisciuda dl 1879 él pié via tla Cina. Al ti à dit arevedei per amour a Chel Bel Die y ai fredesc, lascian endour sia familia, a chela che al fova dret taché, y a sia patria tant ameda, per ne les vedei mai plu.
Trenta agn él sté miscionar, empruma tla Diozeja de Hongkong y spo tl Shantung meridional. Zenza se stancé y con na bonté che davagnova i cuers dla jent, àl operé sciche pionier y miscionar jian da na luegia a l'autra; al ti stova do con lezitenza ai cristians permò convertis, cialova de enjigné de bon catechisc' y se festidiova per la formazion de prevesc dl post. Deplù iadesc àl abù da porté la responsabelté per dut l raion dla miscion; dal 1900 inant fòvel superiour dla congregazion di miscionars de Steyl tla Cina.
Do che sia vita é steda n per de iadesc al pericul, él mort dal malac ai 28 de jené l ann 1908. Freinademetz, che fova respeté y benvolù dai confredesc y dai cristians, vegniva defata conscidré sciche n sant. Tres deplù credenc, dantadut tla Cina, te Südtirol y tl’Austria, à metù man da l invochè do sia interzescion.
L’ann 1936 à scomencé l prozes informatif y dl 1951 l prozes apostolich per la beatificazion.
La domenia dles miscions dl ann sant 1975, é Ujöp Freinademetz vegnù declaré beat adum con Arnold Janssen, l fundadour di Miscionars Verbic, y ai 5 de otober 2003 él vegnù declaré sant.
La ciasa olàche al é nasciü é deventeda l travert de trueps pelegrins da endlonch adalerch.
