Wp/lld/Ladin dolomitan
From Wikimedia Incubator
L tema dl lingaz ladin unifiché, conesciù sciche ladin standard o ladin dolomitan, tol oramai ite na posizion zentrala tla discuscion politica-culturala ladina; articui ti media ladins y nia-ladins y te publicazions scientifiches, toutes de posizion de personalités culturales y comunicac de organisazions politiches desmostra che l ladin scrit unifiché ne é nia demé l afar de puec spezialis`c ma interesseia n numer tres plu gran de persones y istanzes de vigni colour. La chestion dl standard vegn debatuda con gran pascion, y ala ne podessa nia ester autramenter ajache vigni scomenciadiva de normazion linguistica azica diretamenter les raijes sozioculturales y esistenziales dla persona, la maniera de se sentì y de se identifiché, de ester y de parei tla sozieté. N valgugn veid tla standardisazion na erma per defene l'arpejon culturala da l'invajion di gran lingac vejins; d'autri rata al contrar la koiné interladina n pericul per l souravive de sie idiom, dla rejoneda dla oma. Nia dinrer slizia la discuscion te polemiches olà che "cie che an à dagnora sapù y dagnora fat" se scontra con "cie che al fossa da fé" per vitalisé l lingaz ladin.
Ma les scontredes polemiches n'é nia demé l'esprescion de idees desvalives, al é ence gonot la conseguenza de na scleta conescenza dl "pom dla descordia". Sce al é demé puec che conesc l ladin standard diretamenter é dla gauja ence la mancianza de na documentazion menuda sun la natura y i fins de chest lingaz.
L ladin standard messarà cresce y madurì desche vigni auter lingaz, ma per madurì àl debujegn dl contribut dla popolazion.
Chest test é vegnù sourantout dal codejel "Ladin standard. N lingaz unitar per i Ladins dles Dolomites" dl dot. Erwin Valentini.
L laour de coordinament é vegnù porté inant da SPELL.
[edit] Liam
L sit ofizial dl SPELL (servisc per la planificazion y elaborazion dl lingaz ladin)
