Wp/lld/Dolomites

From Wikimedia Incubator

Les Dolomites é na morona de creps calcars dles Alpes meridionales che gej dantaldut te does provinzies talianes setentrionales: Trentin-Südtirol y Venet. Les seides dles Dolomites ne é nia bendefinides. Aladò dla minonga convenzionala vàles a seida a nord con la Val de Puster, tl est enfin al Sest, l jouf de Monte Croce/Kreuzbergsattel y Plaf, a sud vàles a seida apresciapuech sun la ligna Feltre-Genebe/Enego y la Val Sugana y a ovest rùveles a seida con les valedes dl Adesc y dl Isarch. Aladò dla categorisazion dles lies da mont (Alpenverein) dles Alpes orientales ne cumpeiden nia plu laprò i creps de Flem che se ouj devers l Adesc y les Alpes Vizentines. Datrai ràten endere laprò i creps a est dl Plaf, les Dolomites Furlanes, la Val Montana, Cima dei Preti, Monte Duranno o Col Nudo; valch iade ence i creps calcars a ovest dl Adesc che fej pert dl grup dl Brenta. No les enscidites Dolomites dla Engiadina Bassa y nience les Dolomites de Lienza ne vegn ratedes pro les Dolomites tl sens strent.