Wp/koi/Коми отир

From Wikimedia Incubator

Коми отир (мукöд диалекттэзын: коми войтыр, коми утьöр, коми йöз) – финн-йöгра вужись петöм отир. Рöдвуж сьöртi комиэзлö медматынöсь удмурттэз.

Коми отирлöн горт муэз куйлöны Коми Республикаын, Перем ладорын да Киров лапöлын. Ыджыткодь чукöррезöн комиэз олöны и ордча муэзын: Мурман лапöлын, Яран кытшын, Ямал кытшын, Йöгра кытшын.

Коми отирлöн лыдыс Роч му пасьта 2002 вося гижöтöм сьöртi вöлöма пö быдсöн 434 248 морт. Унажыкыс олöны Коми Республикаын (256,5 сюрс морт) да Перем ладорын (103,5 сюрс морт).

Коми отир пытшкын торьясьöны кык ыджыт субэтнос: перем комиэз (125 235 морт) да коми зыряна (309 013 морт).

Коми зыряна коласiсь öнi мöдöны торйöтчыны Изьва дорись комиэз (15 607 морт, кöдна медбöрья гижöтöм дырни босьтöмась аслыныс ним изьватас, рочöн – коми-ижемцы)

Перем комиэз коласiсь торья отирöн шусьöны бы Язьва дорись мукöд комиэз (20 морт, кöдна 2002 вося гижöтöм дырни нимтöмась асьнысö язьвинскöй пермяккезöн).

Мукöд туялiссез лыддьöны перем комиэзöс да коми зырянаöс торья этноссэз (народдэз) туйö. Этiя нёджжöлыс öддьöн кивыв и роч юралiссезлö, да сысянь сiдз и гижсьö быдöс роч небöггезын, этадз и велöтöны коми челядьöс школаэзын.

Но асьнысö коми отир быдлаын ас кыв выланыс шуöны комиэзöн, быд комиыс шуö асьсö коми морт. Быдкодь регионнэзын быдмöм комиэз мырсьытöг вежöртöны öтамöднысö, эд коми йöзлöн басниэз торьясьöны токö кыдз диалекттэз. Ассиныс кывнысö комиэз быдлаын шуöны коми кыв (диалекттэзын сiдзжö коми кыл, коми кыы).

Перем ладорын да Коми Республикаын олiсь комиэзлöн эм быдас аслас кыв стандарт, кöдö аркмöтöмöмась татiсь диалекттэз под вылын. Перем ладорись Коми кытшын лöсьöтöм кывcö шуам перем коми кыв (нето перем комиэзлöн лыддьöтан кыв, рочöнжык: коми-пермяцкöй литературнöй кыв), а Коми Республикаын лöсьöтöм кыв стандартсö – коми зыряналöн лыддьöтан кылöн, нето дженытжыка коми зыряна кылöн (асьныс зырянаыс сiйö нимтöны коми гижöд кыв).

Коми отирлöн эм кык канкар – Кудымкар (Перем ладорись Коми кытшын) да Сыктывкар (Коми Республикаын).

Contents 1 Ним йылiсь 2 Олан муэз 3 Лыд 4 Янсалöм 5 Кыв 6 История 7 Видзöт сiдзжö 8 Öшмöссэз

[edit] Ним йылiсь

Медодз роччез шуöмась быдöс коми отирсö öтласа нимöн – пермяна нето пермяки, пермичи, но XVII вексянь ойвыв комиэсö рочöн пондiсö гижны зырянаöн, а лунвыв комиэсö – пермяккезöн. Этнiя ниммез дынö жагöник велалiсö и асьныс комиэз, да унажыкыс сiдз и кутчисö шуны асьнысö, кöр баитöны рочöн.

Ойвыв комиэз (зыряна) 1921 годö шупкисö роччезлiсь босьтöм нимкодьсö да рочöн шуöны асьнысö дзир комиэзöн (коми народ пö мы), кöть роч наукаын нагладь лöсьöтiсö ним коми-зыряна, мед вежöртны, кöдладорись комиэз йылiсь сёрниыс.

Коми кытшын олiсь комиэзлö, кöдна одзжык асьнысö шуисö рочöн пермяки, а комиöн коми, 1925 во бöрын юралiссез тшöктiсö и рочöн, и комиöн шусьыны коми-пермяккезöн (коми-пермяки). Коми отир татöн дыр вермасисö, мед чапкыны этiйö нимкодьсö, но 1937 во бöрын сетчисö, кöть и аспондасиныс сё шуöны асьнысö важ мозöн - коми.

Язьва дорын олiсь комиэз öнöдз шуöны асьнысö рочöн дзир пермяккезöн, а Киров лапöлын комиэз (зюзьдынса) – пермянаöн.

Мукöд перем комиэз (Сыктыв йылын, Лэт йылын да Луз дорын олiссез), кöдна совет кадöдз рочöн шуöмась асьнысö пермяккезöн, ас кадö пырöмась Коми Республикаö да öнi наукаын лыддисьöны коми зыряна колысын.

Изьва ю дорын олiсь комиэз, кöр мöдöны мыччавны ассиныс неöткодьсö мöдiк зыряна коласiсь шуöны асьнысö изьватас, мый лоö ‘Изьва ладорын олiссез’. Рочöн нiя асьнысö шуöны коми-ижемсаöн (Ижмаöн роччез нимтöны Изьва юсö), кöть и совет кадöдз татiсь отирыс вöлi тöдса кыдз ижемскöй зыряна.

Перем коми кыв вылын, кöр колö тодиль мыччавны кöда субэтнос йылiсь басниыс, пондамö гижны сiдз: перем комиэз да коми зыряна.

[edit] Олан муэз

Унажык сы йылiсь видзöт: Коми отирлöн олан муэз

[edit] Лыд

Унажык сы йылiсь видзöт: Коми отирлöн демография

[edit] Янсалöм

Унажык сы йылiсь видзöт: Коми отирлöн янсалöм

Коми отир янсалö кык ыджыт тор вылö: перем комиэз да коми зыряна, кöдна лоöны коми отирлö медшöр субэтноссэзöн.

Быд ыджыт субэтносын этнограффез торйöтöны поснитжык чукöррез. Коми отирлöн эттшöм чукöррез олöны мöдiккезсянь торйынмоз, нылöн эм аскоддяыс быдлуння оланын, поверьёэзын, юрбытаннэзын да быдöс лов культураын.

Перем комиэз коласын янсалöны:

• Иньвенса (Иньва дорись комиэз)
• Косинса (Кöсва дорись комиэз)
• Лупьинса (Луп дорись комиэз)
• Язьвинса (Язьва дорись комиэз)
• Зюзьдынса (Зюзьдынiсь комиэз)

Коми зыряна коласын эмöсь сэтшöм юкöттэз:

• Лузса (Луз дорись комиэз)
• Сыктылса (Сыктыв дорись комиэз)
• Эжвайывса (Эжва йылiсь комиэз)
• Печораса (Печора катытiсь комиэз)
• Емватас (Емва дорись комиэз)
• Эжватас (Эжва кывтытiсь комиэз)
• Удораса (Удораись комиэз)
• Изьватас (Изьва дорись комиэз)
• Колва яраннэз (Комисялöм яраннэз)

Мукöд комиэз мунöмась Сибирö да сэтчин армöмась сэтшöм чукöррез:

• Из сайись комиэз
• Алтайса (Алтай вылын олiсь комиэз)

[edit] Кыв

Унажык сы йылiсь видзöт: Коми отирлöн кыв

[edit] История

Унажык сы йылiсь видзöт: Коми отирлöн история

[edit] Видзöт сiдзжö

• Коми кыв
• Перем ладорись Коми кытш
• Коми Республика

[edit] Öшмöссэз

• Белицер В.Н. Очерки по этнографии народов коми. М., 1958.
• Коми войтыр: культура да история йылысь дженьыд серпаскывъяс. Сыктывкар, 2008. ISBN 978-963-9876-02-6.
• Коми-зыряне. Историко-этнографический справочник. Сыктывкар, 1993. ISBN 5-7555-0440-7.
• Коми-пермяккез. Кудымкар, 2008. ISBN 978-963-9876-09-05.
• Народы Поволжья и Приуралья // Коми-зыряне, коми-пермяки, марийцы, мордва, удмурты. М., 2000.
• Теплоухов А.Ф. Пермяки и зыряне // Пермский краеведческий сборник. Вып.2. Пермь, 1926.

Финн-йӧгра увтыррез да отиррез
Балтикадор: вепссес | весь | водь | ижора | кареллез (сы лыдын ливвики | людики | тивереччез) | ливвез | финнез (сы лыдын сумь | емь) | чудь | эстонеччез (сы лыдын сету) | нарова Wp/koi/Саами Пермяна: бесермяна | коми (сы лыдын коми-зыряна | коми-пермяккез | коми-ёдзяккез) | удмурттес Волга: буртассес | мари | меря | мещёра | мордва (мокша | эрзя) | мурома Йӧгра: венгррез | вӧгуллез | ӧстяккез