Wp/jam/Jumiekan Kriol
From Wikimedia Incubator
Di habrij Jumiekan di taak wa dehn taak dehn kaali patwa, dehn kaali kriol, ar iivn bad hInglish, askaadn tu ou dehn fiil proud ar kaanful. Jumiekan dem uona hatityuud divaid uoba di langwij di huol a dem taak di muos, likl muos aal di taim. Alduo hInglish a di hofishal langwij a di konchri, ahn dehn aal ab wa dehn kaal Jumiekan hInglish, a muosli bakra ahn tapanaaris yu hie widi iina hofishal serkl, anles smadi waahn himpres wid piiki-puoki. Kaman yuusij rienj frahn Jumiekan hInglish to braad patwa wid bout chrii digrii a separieshan, nof taim ina di wan piika siem wan kanvasieshan.
[edit] hArijin a Jumieka Taak
Linggwis dem aidentifai "pior" Jumiekan, fain muosli a konchri, wid riijanal difrans, laka wahn mixcho a sebntiint senchri hInglish ahn Wes Afrikan, muosli Shwi, kanschrokshan ahn vokiabileri, wid som Panish ahn Puotigiis iin de tu fi a gud mixop. Di haxent ahn kiedens kohn frahn Skatish ahn hAirish. Kansidarin di ischri a Jumieka, dis shudn sopraizn sens di bolk a di papyulieshan disen frahn slieb kiaa kom frahn Wes Afrika, fos bai di Panish, den dem laan hInglish frahn dem British uona, uobasie, hadvenchara, ahn mishaneridem.
[edit] Korant stietos
Potenshal, faib milian piipl, di papyulieshan a Jumieka hinkluudn di dayaspora, taak Jumiekan ina wan faam ar di hada. Laik eni hada livn langwij, ichienj ahn kantinyu chienj uoba taim. Mosa hongl fiuu houl-taima baka bush a konchri ar aisoliet frahn waa gwaan a yaad ina Brixtan ar Bruklin kiahn kot di braad patwa, ar wa wi wi kom fi nuo haz hArkiek ar Klasikal Jumiekan.[1] Di majariti taakin wi faal somwe ina di migl a di spekchrom. Dehn haalwiez a mekop niuu wod laik aatikal ahn tapanaaris, ar chruu di hiiz a hintanashinal chrabl ahn hilekchranik komyunikieshan, baara dem frahn elswe, laik bling-bling frahn ip-ap. Di langwij wi chienj bot inaa ded fari tek iin eni niuu wod ahn Jumiekanaiz dem. So langx az Jumiekandem piich patan no chienj, dehn wi kantiniu tek di siem hInglish ahn toni ina dehn uona langwij. No kia umuch dehn wahn sopresi, a hit Jumieka piipl wi haalwiez taak. Idon du aredi. A dehn langwij muo dahn heniting els we set dem apaat az wahn piipl.
