Wp/jam/Evan Juonz
From Wikimedia Incubator
Evan Juonz (Evan Jones) baan a Puotlan, Jumieka ina 1927. Im gruo op pan wahn banaana faam ahn gaa skuul a Manruo Kalij. Afta dat, im go Aavafod (Haverford) Kalij ina Penslvienia ahn Wadam (Wadham) Kalij, a hAxford, we im get ihn BA anaz, ina 1952. Im tiich Inglish Lichicha a di Jaaj (George) Skuul, an op a Wezlian (Wesleyan) Yunivorsiti we de ina Kanektikot. Im muuv gaa Ingglan ina 1956, an a wahn indipendant raita uova de. Tuu a im papyula puoim dem niem, “Di Banaana Man Sang,” an di “Sadnis a di Banaana Man,” we get poblish ina puoim kalekshan regla.
[edit] Di Banaana Man Sang
- Tuoris, wait man, a waip ihn fies,
- Miit mi iina Guolden Gruov maakit plies,
- Im faas pahn mi uol kluoz dem broun wid stien,
- An suok rait chruu wid di Puotlan rien,
- Ihn kot ihn yai, ton op ihn nuoz,
- Ahn se, “You’re a beggar man I suppose?”
- Den ihn se, “Boy, get some occupation,
- Be of some value to you nation.”
- So mi se, “Bai Gad an dis big rait an,
- Yu mos rekagnaiz wahn banaana man.
- Op in di ilz, we di striim dem kuul,
- An molit ahn jangga swim ina di puul,
- Mi av ten ieka a mountn said,
- Ahn wahn dienti-fut-dangki we mi raid,
- Fuo Gruos Michel, ahn fuo Lakatan,
- Sohn kuoknat chrii, ahn sohn ilz a yam,
- An mi paascha pan di veri siem lan,
- Faiv shii guot an wahn big blak ram,
- Dat bai Gad an dis big rait an,
- Iz di prapati af a banaana man.
- Mi lef mi yaad erli maanin taim,
- An set mi fut tu di mountn klaim,
- Mi ben mi bak tu di at son tail,
- An mi kotlas ring pan di stuoni sail,
- Plouwin an wiidin, digin an plaantin,
- Til maasa Son jrap bak a Jangkro mountin,
- Den uom agen ina kuul kuul iivlin taim,
- Praps a wisl dis likl raim,
- (Sing) Priez Gad an mi big rait an,
- Mi ago liv an ded a banaana man.
- Banaana die a fi mi speshal die,
- Mi kot mi stem dem an de pan mi wie,
- Luod op di dangki, ahn lef di lan,
- Ed dong di il tu di banaana stan,
- Wen di chok kom roun mi tek a raid,
- Aal di wie dong tu di aaba said,
- A dat de nait de, we yu, tuoris man,
- Uda chienj yu plies wid a banaana man,
- Yes, bai Gad an mi big rait an,
- Mi ago liv an ded a banaana man.
- Di bie kyaam an di muun brait,
- Di il dem luk blak faar di skai lait,
- Dong a di dak, yaav wahn Inglish ship,
- Shi a res afta ar uoshan trip,
- Wail pan di pier dier iz a heleva osl,
- Taliman, kyaria, ebribadi in a bosl,
- Wid stem pan dehn ed ina wahn lang blak sniek,
- Som a sing di sang dem we ongl banaana man miek,
- Laik, (Sing) Priez Gad an mi big rait an,
- Mi ago liv an ded a banaana man.
- Den di piement kom, ahn wi av sohn fon,
- Mi, Ziikiel, Breda, an Dopi Son.
- Dong a di baar nier Yuunaitid Waaf,
- Wi nak bak a wait rom, ahn bos a laaf,
- Ful op di emti bag fi muo tail,
- Wid sailfish, bredfruut, kuoknat ail.
- Den ed bak a mi yaad fi go slip,
- Wahn prapa sliip we lang ahn diip.
- Yes, Bai Gad an mi big rait an,
- Mi ago liv an ded a banaana man.
- So wen yu diiz uol kluoz broun wid stien,
- Ahn suok rait chuu wid di Puotlan rien,
- No kot yu yai, a no ton op yu nuoz,
- Duohn joj a man bai ihn pachi-pachi kluoz,
- Mi iz a chrang man, a proud man, ahn mi frii,
- Frii laka dem mountn ya, frii laka di sii,
- Mi nuo miself, an mi nuo mi wiez,
- An a go sing wid praid til di en a mi diez,
- (Sing) Priez Gad an mi big rait an,
- Mi ago liv an ded a banaana man.
