Wp/gag/Gagauz Yeri

From Wikimedia Incubator

Gagauz Yeri - gagauzların sık (kompakt) formada yaşadıkları geografik bölge.

Üülen Bessarabiyada yerleşir hem Bucak topraan büük bir kısmını içersinä alêr. XVIII-XIX asırlarda gagauz halkının büük payı toplu olarak Balkannardan geläräk Rusiya İmperiyasının Osmannı İmperiyasınnan kazandıı Bucak topraana saabilendi hem bölä peydalandı Gagauz Yeri. Gagauz Yerinin eski insannarı - übür türk halkı nogaylar zamanna göç ettilär Dobruca hem başka regionnara. 1918-ci yılda Gagauz Yeri bütün Bucak hem Bessarabiyalan birleştirildi Büük Rumıniya Padişaalıına. 1940 yılında Sovet Soțialist Respublikaları Birlii verdi bir ultimatum Rumıniyaya ani geeri istedi Prut hem Nistru arasındaki topraaları, o sıradan Gagauz Yerini. Ama 1941 yılında Rumıniya enidän armatasını gönderdi Bessarabiya hem Bucaa. 1944-cü yılda Rumıniya kaybettiynän cenki Germaniya blokulan barabar, Gagauz Yeri hem bütün Bessarabiya girdi SSRB kuvetinä. İkinci Dünnä Cenkindän sora Sovet Soțialist Respublikları Birliin Moldaviya SSR (büün büük payı Avtonom Territorial Bölümlüü Gagauz Yeri) hem Ukraina SSR-in Odessa bölgesinin arasında paylaşıldı (Bolgrad,Reni h.b. dolaylar). 1991 yılında Moldaviya hem Ukrainanın Odessa bölgesi arasında administrativ sınırlar dönüştü devletlerarası granițaya. Bölä, istoriyalık Gagauz Yeri büün pay alêr iki suveren devlet - Republika Moldova hem Ukraina topraaları içindä.