Ws/cop/ϯⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ

From Wikimedia Incubator

ϯⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ

ⲡⲁⲓⲥϧⲁⲓ ⲁϥϭⲓ ⲉⲃⲟⲗϩⲓⲧⲉⲛ ⲟⲩⲥϧⲁⲓ ⲉⲧⲥϧⲏⲟⲩⲧ ϩⲓⲧⲉⲛ ⲡⲓⲇⲓⲁⲕⲟⲛⲟⲥ ⲛ̀ⲥⲏⲓⲛⲓ ⲓⲙⲓⲗ ⲙⲁϩⲓⲣ ⲓⲥϩⲁⲕ (ⲕⲁϩⲓⲣⲏ: 1707 ⲙ̀ⲙ̅ⲣ̅) ⲟⲩⲟϩ ⲛ̀ⲧⲉⲥⲟⲩⲟⲧⲉⲃ ϩⲓⲧⲉⲛ ⲙ̀ⲙⲟⲓ (ⲁⲙⲃⲣⲟⲥⲉ ⲡⲁⲩⲗⲟⲥ). ⲙⲁⲣⲉⲕϫⲉⲙⲥ ⲙ̀ⲛⲁⲓ.

Contents 1 ⲡⲉⲥⲣⲁⲛ 2 ⲧⲏⲡⲓ ⲛ̀ⲧⲉ ⲛⲉⲥⲉϩⲟⲟⲩ 3 ⲛⲉⲥⲁⲃⲟⲧ 4 ⲛⲓⲣⲟⲙⲡⲓ ⲛ̀ϩⲁⲡⲗⲟⲩⲛ ⲛⲉⲙ ⲛⲓⲣⲟⲙⲡⲓ ⲛⲁ ⲡⲉϩⲟⲟⲩ ⲛ̀ⲧⲟⲩϩⲟ 5 ⲡⲉⲙⲓ ⲉ̀ϯⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ ⲑⲁ ⲡⲉϩⲟⲟⲩ ⲛ̀ⲧⲟⲩϩⲟ 5.1 ⲛⲓⲥⲏⲟⲩ ⲛ̀ⲧⲉ ϯⲣⲟⲙⲡⲓ 5.2 ⲡⲓ4 ⲛ̀ⲥⲏⲟⲩ ⲛ̀ⲧⲉ ϯⲣⲟⲙⲡⲓ 6 ⲛⲓⲉϩⲟⲟⲩ ⲛ̀ⲧⲉ ⲡⲓⲁⲛϣⲁϣϥ

[edit] ⲡⲉⲥⲣⲁⲛ

ϯⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ ⲟⲩⲣⲟⲙⲡⲓ ⲛ̀ⲁⲡⲁⲥ ⲧⲉ ⲉⲁⲥⲉⲣϩⲏⲧⲥ ⲓⲥϫⲉⲛ ⲛⲓⲉϩⲟⲟⲩ ⲛ̀ⲧⲉ ⲛⲓϩⲟⲩⲁϯ ⲙ̀ⲫⲁⲣⲁⲱ. ⲉⲧⲁ ϩⲁⲛⲁⲛϣⲟ ⲛ̀ⲣⲉⲙⲛ̀ⲭⲏⲙⲓ ϭⲓ ⲡⲓⲭⲗⲟⲙ ⲛ̀ⲧⲉ ϯⲙⲁⲣⲧⲩⲣⲓⲁ ⲉⲑⲃⲉ ⲫⲣⲁⲛ ⲙ̀ⲡⲭ̅ⲥ̅ ϧⲉⲛ ⲛⲓⲉϩⲟⲟⲩ ⲛ̀ⲧⲉ ⲇⲓⲟⲕⲗⲏⲧⲓⲁⲛⲟⲥ ⲡⲟⲩⲣⲟ. ⲁⲩϯⲣⲉⲛ ⲫⲣⲁⲛ ⲛ̀ϯⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ ϫⲉ ϯⲣⲟⲙⲡⲓ ⲛ̀ⲧⲉ ⲛⲓⲙⲁⲣⲧⲩⲣⲟⲥ. ⲟⲩⲟϩ ⲁⲩⲱⲡ ⲛ̀ⲛⲓⲣⲟⲙⲡⲓ ⲓⲥϫⲉⲛ ϩⲏ ⲛ̀ϯⲙⲉⲧⲟⲩⲣⲟ ⲛ̀ⲧⲉ ⲇⲓⲟⲕⲗⲏⲧⲓⲁⲛⲟⲥ ⲉⲛⲁⲥ ϧⲉⲛ ϯⲣⲟⲙⲡⲓ 284 ⲙ̀ⲡⲭ̅ⲥ̅.

[edit] ⲧⲏⲡⲓ ⲛ̀ⲧⲉ ⲛⲉⲥⲉϩⲟⲟⲩ

ϯⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ ⲟⲩⲣⲟⲙⲡⲓ ⲛ̀ⲣⲏ ⲧⲉ ⲓⲉ ϧⲉⲛ ⲟⲩⲧⲁϫⲣⲟ ⲛ̀ϩⲟⲩⲟ ⲟⲩⲣⲟⲙⲡⲓ ⲛ̀ⲥⲓⲟⲩ ⲧⲉ ⲉⲥⲟⲩⲉϩ ⲛ̀ⲥⲁ ⲡⲓϣⲱⲡϣ. ⲟⲩⲟϩ ⲟⲩⲟⲛ 365 ⲛ̀ⲉϩⲟⲟⲩ ϧⲉⲛ ϯⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ ⲓⲉ 366 ⲛ̀ⲉϩⲟⲟⲩ ϧⲉⲛ ϯⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ ⲑⲁ ⲡⲓⲉϩⲟⲟⲩ ⲛ̀ⲧⲟⲩϩⲟ ⲑⲏⲉϣⲁⲥⲓ ⲛ̀ⲟⲩⲥⲟⲡ ⲛ̀ϥⲧⲟⲉ ⲛ̀ⲣⲟⲙⲡⲓ ⲛⲓⲃⲉⲛ.

[edit] ⲛⲉⲥⲁⲃⲟⲧ

ⲟⲩⲟⲛ 12 ⲛ̀ⲁⲃⲟⲧ ⲛⲉⲙ ⲟⲩⲕⲟⲩϫⲓ ⲛ̀ⲁⲃⲟⲧ ϧⲉⲛ ϯⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ ⲟⲩⲟϩ ⲛⲁⲓ ⲛⲉ ⲛⲓⲣⲁⲛ ⲛ̀ⲧⲉ ⲛⲓⲁⲃⲟⲧ ⲛ̀ⲣⲉⲙⲛ̀ⲭⲏⲙⲓ ⲕⲁⲧⲁ ϯϫⲓⲛⲥⲁϫⲓ ⲛ̀ⲧⲉ ⲡⲉⲙϩⲓⲧ:

1. ⲑⲱⲟⲩⲧ
2. ⲡⲁⲱⲡⲓ (ⲡⲁⲟⲡⲓ)
3. ⲁⲑⲱⲣ
4. ⲭⲟⲓⲁⲕ
5. ⲧⲱⲃⲓ
6. ⲉⲙϣⲓⲣ
7. ⲫⲁⲙⲉⲛⲱⲑ
8. ⲫⲁⲣⲙⲟⲩⲑⲓ
9. ⲡⲁϣⲟⲛⲥ
10. ⲡⲁⲱⲛⲓ
11. ⲉⲡⲏⲡ
12. ⲙⲉⲥⲱⲣⲏ
13. ⲡⲓⲕⲟⲩⲓϫⲓ ⲛ̀ⲁⲃⲟⲧ: ⲉⲧⲉ ⲡⲓ5 ⲓⲉ ⲡⲓ6 ⲛ̀ⲧⲉ ⲡⲓⲧⲉⲩⲧⲉⲣⲟⲛ.

ⲁⲗⲗⲁ ϣⲁⲣⲉ ⲛⲓⲣⲉⲙⲛ̀ⲭⲏⲙⲓ ⲧⲁⲟⲩⲉ ⲛⲓⲣⲁⲛ ⲛ̀ⲧⲉ ⲛⲓⲁⲃⲟⲧ ⲕⲁⲧⲁ ϯϫⲓⲛⲥⲁϫⲓ ⲛ̀ⲧⲉ ⲫⲣⲏⲥ:

1. ⲑⲟⲟⲩⲧ
2. ⲡⲁⲁⲡⲉ
3. ϩⲁⲑⲱⲣ
4. ⲕⲓⲁϩⲕ
5. ⲧⲟⲩⲃⲉ
6. ⲉⲙϣⲓⲣ
7. ⲡⲁⲣⲙ̅ϩⲁⲧ
8. ⲡⲁⲣⲙⲟⲩⲧⲉ
9. ⲡⲁϣⲁⲛⲥ (ⲡⲁϣⲟⲛⲥ)
10. ⲡⲁⲱⲛⲉ
11. ⲉⲡⲏⲡ
12. ⲙⲉⲥⲱⲣ
13. ⲉⲡⲁⲅⲟⲩⲙⲉⲛⲟⲛ

ⲛⲉ ⲟⲩⲟⲛ ⲕⲉⲣⲁⲛ ⲙ̀ⲡⲓⲁⲃⲟⲧ ⲉⲡⲏⲡ ⲉⲧⲉ ⲫⲁⲓ ⲧⲁⲯⲁⲧⲉ (ⲧⲁⲡⲥⲟⲧⲉ) ϧⲉⲛ ϯϫⲓⲛⲥⲁϫⲓ ⲛ̀ⲧⲉ ⲫⲣⲏⲥ ⲓⲉ ⲧⲁⲩⲥⲁϯ (ⲇⲁⲟⲩⲥⲁϯ) ϧⲉⲛ ϯϫⲓⲛⲥⲁϫⲓ ⲛ̀ⲧⲉ ⲫⲓⲟⲙ. ⲟⲩⲟϩ ⲛⲁⲩⲉⲣϣⲁⲩ ⲛ̀ϯⲣⲟⲙⲡⲓ ⲙ̀ⲃⲉⲣⲓ ⲟⲩⲟϩ ⲛⲁⲩⲙⲟⲩϯ ⲉ̀ⲡⲓϩⲟⲩⲓⲧ ⲛ̀ⲉϩⲟⲟⲩ ⲛ̀ⲧⲉ ϯⲣⲟⲙⲡⲓ ⲉⲧⲉ ⲥⲟⲩⲁⲓ ⲛ̀ⲑⲱⲟⲩⲧ ⲡⲉ ϫⲉ ⲡⲓⲭⲗⲟⲙ ⲛ̀ⲧⲉ ϯⲣⲟⲙⲡⲓ. ⲛ̀ϩⲁⲛⲥⲟⲡ ⲇⲉ ⲛⲁⲩⲙⲟⲩϯ ⲉⲣⲟⲥ ϫⲉ ⲧⲁⲫⲉ ⲛ̀ⲧⲉ ϯⲣⲟⲙⲡⲓ. ⲟⲩⲟϩ ϧⲉⲛ ⲛⲓϫⲱⲟⲩ ⲛ̀ⲁⲡⲁⲥ ⲛⲁⲣⲉ ⲛⲓⲣⲉⲙⲣⲏⲥ ⲉⲣϣⲁⲓ ⲉ̀ⲡϩⲓϣⲉⲛⲛⲟⲩϥⲓ ⲛⲉⲙ ⲡϫⲓⲛϭⲓⲥⲁⲣⲝ ϧⲉⲛ ⲥⲟⲩ7 ⲙ̀ⲫⲁⲣⲙⲟⲩⲑⲓ ⲛ̀ⲧϣⲉⲃⲓⲱ ⲛ̀ⲥⲟⲩ29 ⲙ̀ⲫⲁⲙⲉⲛⲱⲑ. ⲉⲑⲃⲉ ⲫⲁⲓ ⲛⲁⲩⲙⲟⲩϯ ⲉ̀ⲡⲁⲓⲁⲃⲟⲧ ⲫⲁⲣⲙⲟⲩⲑⲓ ϫⲉ ⲡⲓⲁⲃⲟⲧ ⲙ̀ⲃⲉⲣⲓ. ⲟⲩⲟϩ ⲟⲩⲟⲛ 30 ⲛ̀ⲉϩⲟⲟⲩ ⲛ̀ⲁⲃⲟⲧ ⲛⲓⲃⲉⲛ ⲛ̀ⲣⲉⲙⲛ̀ⲭⲏⲙⲓ ⲁⲗⲗⲁ ⲟⲩⲟⲛ 5 ⲓⲉ 6 ⲛ̀ⲉϩⲟⲟⲩ ϧⲉⲛ ⲡⲓⲕⲟⲩϫⲓ ⲛ̀ⲁⲃⲟⲧ ⲉⲧⲟⲩⲙⲟⲩϯ ⲉⲣⲟϥ ϧⲉⲛ ϯⲙⲉⲧⲟⲩⲉⲓⲛⲓⲛ ⲛⲉⲙ ϯⲙⲉⲧⲣⲉⲙⲛ̀ⲭⲏⲙⲓ ⲉⲧⲥⲁⲣⲏⲥ ϫⲉ ⲉⲡⲁⲅⲟⲩⲙⲉⲛⲱⲛ.

[edit] ⲛⲓⲣⲟⲙⲡⲓ ⲛ̀ϩⲁⲡⲗⲟⲩⲛ ⲛⲉⲙ ⲛⲓⲣⲟⲙⲡⲓ ⲛⲁ ⲡⲉϩⲟⲟⲩ ⲛ̀ⲧⲟⲩϩⲟ

ⲟⲩⲟⲛ 5 ⲛ̀ⲉϩⲟⲟⲩ ϧⲉⲛ ⲡⲓⲕⲟⲩϫⲓ ⲛ̀ⲁⲃⲟⲧ ⲛ̀ⲧⲉ ϯⲣⲟⲙⲡⲓ ⲛ̀ϩⲁⲡⲗⲏ ⲛⲉⲙ 6 ⲛ̀ⲉϩⲟⲟⲩ ϧⲉⲛ ⲡⲓⲕⲟⲩϫⲓ ⲛ̀ⲁⲃⲟⲧ ⲛ̀ⲧⲉ ϯⲣⲟⲙⲡⲓ ⲑⲁ ⲡⲉϩⲟⲟⲩ ⲛ̀ⲧⲟⲩϩⲟ ϯⲣⲟⲙⲡⲓ ⲑⲁ ⲡⲉϩⲟⲟⲩ ⲛ̀ⲧⲟⲩϩⲟ ϣⲁⲥⲓ ⲛ̀ⲟⲩⲥⲟⲡ ⲛ̀ϥⲧⲟⲉ ⲛ̀ⲣⲟⲙⲡⲓ ⲛⲓⲃⲉⲛ ⲉⲧⲉ ⲑⲁⲓ ⲧⲉ ⲙⲉⲛⲉⲛⲥⲁ 3 ⲛ̀ⲣⲟⲙⲡⲓ ⲛ̀ϩⲁⲡⲗⲟⲩⲛ ⲟⲩⲟϩ ϣⲁⲩⲧⲟⲩϩⲟ ⲙ̀ⲡⲉϩⲟⲟⲩ ⲛ̀ⲧⲟⲩϩⲟ ⲉ̀ⲡⲓⲕⲟⲩϫⲓ ⲛ̀ⲁⲃⲟⲧ. ⲡⲁⲓⲉϩⲟⲟⲩ ⲛ̀ⲧⲟⲩϩⲟ ⲫⲁⲓ ϣⲁⲩⲙⲟⲩϯ ⲉⲣⲟϥ ϫⲉ ⲡⲉϩⲟⲟⲩ ⲛ̀ⲧⲉⲡⲓⲑⲉⲥⲓⲥ.

[edit] ⲡⲉⲙⲓ ⲉ̀ϯⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ ⲑⲁ ⲡⲉϩⲟⲟⲩ ⲛ̀ⲧⲟⲩϩⲟ

ϯⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ ⲑⲁ ⲡⲉϩⲟⲟⲩ ⲛ̀ⲧⲟⲩϩⲟ ϯⲣⲟⲙⲡⲓ ⲙ̀ⲙⲁϩ3 ⲧⲉ ⲙⲉⲛⲉⲛⲥⲁ ϯⲣⲟⲙⲡⲓ ⲉⲧⲉⲥϣⲱⲡ ⲉⲣⲟⲥ ⲙ̀ⲡϫⲓⲛⲫⲱϣ ⲉⲃⲟⲗ ⲛⲓⲥ 4 ⲛ̀ⲟⲩⲉϣⲉⲛ ⲥⲱϫⲡ. ⲕⲁⲧⲁ ⲟⲩⲥⲙⲟⲧ 1704/4 = 426 ⲛ̀ⲟⲩⲉϣⲉⲛ ⲥⲱϫⲡ ⲉⲑⲃⲉ ⲫⲁⲓ ϯⲣⲟⲙⲡⲓ ⲙ̀ⲙⲁϩ3 ⲙⲉⲛⲉⲛⲥⲁ 1704 ⲉⲧⲉ ⲑⲁⲓ ⲧⲉ ϯⲣⲟⲙⲡⲓ 1707 ⲟⲩⲣⲟⲙⲡⲓ ⲧⲉ ⲉ̀ⲑⲁ ⲟⲩⲉϩⲟⲟⲩ ⲛ̀ⲧⲟⲩϩⲟ. ⲡⲁⲓⲣⲏϯ ⲛⲁⲓ ϩⲁⲛⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ ⲛ̀ϩⲁⲡⲗⲟⲩⲛ ⲛⲉ:

1700, 1701, 1702, 1704, 1705, 1706, 1708, 1709, 1710, 1712, 1713, 1714, 1716, 1717, 1718, 1720, 1721, 1722.

ⲟⲩⲟϩ ⲛⲁⲓ ϩⲁⲛⲣⲟⲙⲡⲓ ⲛ̀ⲣⲉⲙⲛ̀ⲭⲏⲙⲓ ⲉⲛⲁ ⲟⲩⲉϩⲟⲟⲩ ⲛ̀ⲧⲟⲩϩⲟ ⲛⲉ:

1703, 1707, 1711, 1715, 1719, 1723.

[edit] ⲛⲓⲥⲏⲟⲩ ⲛ̀ⲧⲉ ϯⲣⲟⲙⲡⲓ

ⲡ3 ⲛ̀ⲥⲏⲟⲩ ⲛ̀ⲧⲉ ϯⲣⲟⲙⲡⲓ

ⲛⲓϩⲟⲩⲁϯ ⲛ̀ⲣⲉⲙⲛ̀ⲭⲏⲙⲓ ⲁⲩⲫⲱϣ ⲛ̀ϯⲣⲟⲙⲡⲓ ⲉ̀3 ⲛ̀ⲥⲏⲟⲩ ⲉⲧⲉ ⲛⲁⲓ ⲛⲉ ⲡⲥⲏⲟⲩ ⲛ̀ⲛⲓⲙⲱⲟⲩ ⲛⲉⲙ ⲫⲁ ⲛⲓⲥⲓϯ ⲛⲉⲙ ⲫⲁ ⲛⲓⲁⲏⲣ. ⲕⲁⲧⲁ ϯⲕⲁϩⲥ ⲛⲉⲙ ϯⲭⲣⲏⲥⲓⲥ ⲛ̀ⲉⲕⲕⲗⲏⲥⲓⲁ ϯⲛⲟⲩ ⲡⲓϩⲟⲩⲓⲧ ⲛ̀ⲥⲏⲟⲩ ⲉⲧⲉ ⲡⲓⲥⲏⲟⲩ ⲡⲉ ⲛ̀ⲧⲉ ⲛⲓⲙⲱⲟⲩ ⲛ̀ⲧⲉ ⲫⲓⲁⲣⲟ ⲫⲏⲉⲧⲟⲩⲙⲟⲩϯ ⲉⲣⲟϥ ϫⲉ ϯⲁⲙⲏⲓⲣⲓ (ⲧⲉⲙⲏⲣⲉ) ϥⲉⲣϩⲏⲧⲥ ⲓⲥϫⲉⲛ ⲡϣⲁⲓ ⲙ̀ⲙⲓⲭⲁⲏⲗ ⲡⲓⲁⲣⲭⲏⲁⲅⲅⲉⲗⲟⲥ ϧⲉⲛ ⲥⲟⲩ12 ⲙ̀ⲡⲁⲱⲛⲓ ⲟⲩⲟϩ ϥⲙⲟⲩⲛ ⲉⲃⲟⲗ ϣⲁ ⲥⲟⲩ9 ⲙ̀ⲡⲁⲟⲡⲓ. ⲟⲩⲟϩ ⲡⲓⲙⲁϩ2 ⲡⲥⲏⲟⲩ ⲡⲉ ⲛ̀ⲧⲉ ⲛⲓⲥⲓϯ ⲛⲉⲙ ⲛⲓⲥⲓⲙ ⲛⲉⲙ ⲛⲓⲣⲱⲧ ⲛ̀ⲧⲉ ⲧⲕⲟⲓ ⲓⲥϫⲉⲛ ⲥⲟⲩ10 ⲙ̀ⲡⲁⲟⲡⲓ ϣⲁ ⲥⲟⲩ10 ⲛ̀ⲧⲱⲃⲓ ⲟⲩⲟϩ ⲡⲓⲙⲁϩ3 ⲡⲥⲏⲟⲩ ⲡⲉ ⲛ̀ⲧⲉ ⲛⲓⲁⲏⲣ ⲛ̀ⲧⲉ ⲧⲫⲉ ⲛⲉⲙ ⲛⲓⲕⲁⲣⲡⲟⲥ ⲛ̀ⲧⲉ ⲡⲕⲁϩⲓ ⲓⲥϫⲉⲛ ⲡϣⲁⲓ ⲛ̀ϯⲉⲡⲓⲫⲁⲛⲓⲁ ϧⲉⲛ ⲥⲟⲩ11 ⲛ̀ⲧⲱⲃⲓ ϣⲁ ⲥⲟⲩ 11 ⲙ̀ⲡⲁⲱⲛⲓ. ⲉⲑⲃⲉ ⲫⲁⲓ ϣⲁⲣⲉ ϯⲉⲕⲕⲗⲏⲥⲓⲁ ⲛ̀ⲣⲉⲙ̀ⲛⲭⲏⲙⲓ ϣⲗⲏⲗ ⲉϩⲣⲏⲓ ⲉϫⲉⲛ ϯⲁⲙⲏⲓⲣⲓ ϧⲉⲛ ⲡⲥⲏⲟⲩ ⲛ̀ⲧⲉ ⲛⲓⲙⲱⲟⲩ ⲛⲉⲙ ⲉϫⲉⲛ ⲛⲓⲥⲓϯ ⲛⲉⲙ ⲛⲓⲥⲓⲙ ⲛⲉⲙ ⲛⲓⲣⲱⲧ ̀ⲛⲧⲉ ⲧⲕⲟⲓ ϧⲉⲛ ⲡⲥⲏⲟⲩ ⲛ̀ⲛⲓⲥⲓϯ ⲛⲉⲙ ⲉϫⲉⲛ ⲛⲓⲁⲏⲣ ⲛ̀ⲧⲉ ⲧⲫⲉ ⲛⲉⲙ ⲛⲓⲕⲁⲣⲡⲟⲥ ⲛ̀ⲧⲉ ⲡⲕⲁϩⲓ ϧⲉⲛ ⲡⲥⲏⲟⲩ ⲛ̀ⲛⲓⲁⲏⲣ ⲛⲉⲙ ⲛⲓⲟⲩⲧⲁϩ.

[edit] ⲡⲓ4 ⲛ̀ⲥⲏⲟⲩ ⲛ̀ⲧⲉ ϯⲣⲟⲙⲡⲓ

ⲓⲥϫⲉⲛ ⲛⲓϫⲱⲟⲩ ⲛ̀ϩⲟⲩⲁϯ ⲁⲩⲥⲱⲟⲩⲛ ⲟⲛ ⲛ̀4 ⲛ̀ⲥⲏⲟⲩ ⲛ̀ⲧⲉ ϯⲣⲟⲙⲡⲓ ⲟⲩⲟϩ ϧⲉⲛ ⲛⲓϣⲉⲛ̀ⲣⲟⲙⲡⲓ ⲛⲁ ⲑⲙⲏϯ ⲁⲛⲉⲣⲭⲣⲁⲥⲑⲉ ⲙ̀ⲡⲁⲓϫⲓⲛⲫⲱϣ ⲡⲓ4 ⲇⲉ ⲛ̀ⲥⲏⲟⲩ ⲛⲁⲓ ⲛⲉ: ϯⲫⲣⲱ, ϯⲁⲛⲟⲓⲝⲓⲥ (ⲡⲓⲉⲁⲣ), ⲡⲓϣⲱⲙ, ⲡⲓϩⲱ ⲛ̀ϣⲱⲙ ϣⲁⲩⲙⲟⲩϯ ⲉ̀ⲡⲓϩⲉ ⲛ̀ϣⲱⲙ ϧⲉⲛ ϯⲙⲉⲧⲟⲩⲉⲓⲛⲓⲛ ϫⲉ ⲡⲑⲓⲛⲟⲡⲟⲣⲟⲛ.

[edit] ⲛⲓⲉϩⲟⲟⲩ ⲛ̀ⲧⲉ ⲡⲓⲁⲛϣⲁϣϥ

ϣⲁⲩⲙⲟⲩϯ ⲉ̀ⲡⲓⲁⲛ7 ϧⲉⲛ ϯⲙⲉⲧⲟⲩⲉⲓⲛⲓⲛ ϫⲉ ϯⲉⲃⲇⲟⲙⲁⲥ ⲟⲩⲟϩ ⲛⲁⲓ ⲛⲉ ⲛⲓⲉϩⲟⲟⲩ ⲛ̀ⲧⲉ ⲡⲓⲁⲛ7:

1. ϯⲕⲩⲣⲓⲁⲕⲏ
2. ⲡⲓⲥⲛⲁⲩ
3. ⲡⲓϣⲟⲙⲧ
4. ⲡⲓϥⲧⲱⲟⲩ
5. ⲡⲓⲧⲓⲟⲩ
6. ϯⲡⲁⲣⲁⲥⲕⲉⲩⲏ
7. ⲡⲓⲥⲁⲃⲃⲁⲧⲟⲛ

ϯⲕⲩⲣⲓⲁⲕⲏ ϣⲁⲩⲙⲟⲩϯ ⲉⲣⲟⲥ ⲟⲛ ϫⲉ ⲡⲓⲉϩⲟⲟⲩ ⲛ̀ⲕⲩⲣⲓⲁⲕⲟⲛ ⲓⲉ ⲡⲓⲟⲩⲁⲓ. ⲡⲓ2 ⲉⲧⲉ ⲡⲓⲉϩⲟⲟⲩ ⲙ̀ⲡ2 ⲓⲉ ⲡⲓⲉϩⲟⲟⲩ ⲙ̀ⲙⲁϩ2 ϣⲁⲩⲙⲟⲩϯ ⲉⲣⲟϥ ⲟⲛ ϫⲉ ⲫⲟⲟⲩ ⲛ̀ⲁⲃⲓⲧ (ⲁⲣⲏⲟⲩ ⲁⲩϫⲉⲣⲉ ⲡⲓⲉϩⲟⲟⲩ ⲙ̀ⲡⲓⲓⲟϩ). ⲡⲓ3 ϣⲁⲩⲙⲟⲩϯ ⲉⲣⲟϥ ϫⲉ ⲡⲓⲉϩⲟⲟⲩ ⲙ̀ⲡ3 ⲓⲉ ⲡⲓⲉϩⲟⲟⲩ ⲙ̀ⲙⲁϩ3. ⲡⲓ4 ϣⲁⲩⲙⲟⲩϯ ⲉⲣⲟϥ ϫⲉ ⲡⲓⲉϩⲟⲟⲩ ⲙ̀ⲡ4 ⲓⲉ ⲡⲓⲉϩⲟⲟⲩ ⲙ̀ⲙⲁϩ4. ⲡⲓ5 ϣⲁⲩⲙⲟⲩϯ ⲉⲣⲟϥ ϫⲉ ⲡⲓⲉϩⲟⲟⲩ ⲙ̀ⲡ5 ⲓⲉ ⲡⲓⲉϩⲟⲟⲩ ⲙ̀ⲙⲁϩ5. ϯⲡⲁⲣⲁⲥⲕⲉⲩⲏ ϣⲁⲩⲙⲟⲩϯ ⲉⲣⲟⲥ ⲟⲛ ϫⲉ ⲡⲓ6 ⲓⲉ ⲡⲓⲉϩⲟⲟⲩ ⲙ̀ⲡ6 ⲓⲉ ⲡⲓⲉϩⲟⲟⲩ ⲙ̀ⲙⲁϩ6. ϯⲡⲁⲣⲁⲥⲕⲉⲩⲏ ⲟⲩⲣⲁⲛ ⲛ̀ⲟⲩⲉⲓⲛⲓⲛ ⲡⲉ ⲉϥⲥϧⲏⲟⲩⲧ ϧⲉⲛ ϯⲇⲓⲁⲑⲏⲕⲏ ⲙ̀ⲃⲉⲣⲓ ⲉ̀ϣⲁⲩⲟⲩⲁϩⲙⲉϥ ϫⲉ ⲡⲓⲥⲟⲃϯ ⲉⲑⲃⲉ ϫⲉ ϯⲡⲁⲣⲁⲥⲕⲉⲩⲏ ⲛⲉ ⲟⲩⲉϩⲟⲟⲩ ⲡⲉ ⲙ̀ⲡⲁⲣⲁⲥⲕⲉⲩⲏ (ⲉⲧⲉ ⲡⲓⲥⲟⲃϯ ⲡⲉ) ⲛ̀ⲧⲉ ⲛⲓⲓⲟⲩⲇⲁⲓ ⲉϥϧⲁϫⲱϥ ⲙ̀ⲡⲓⲙⲧⲟⲛ ⲛ̀ⲧⲉ ⲡⲓⲥⲁⲃⲃⲁⲧⲟⲛ. ⲡⲓⲥⲁⲃⲃⲁⲧⲟⲛ ⲟⲩⲣⲁⲛ ⲛ̀ϩⲉⲃⲣⲉⲟⲥ ⲡⲉ ⲉϣⲁⲩⲟⲩⲁϩⲙⲉϥ ϫⲉ ⲡⲓⲙⲧⲟⲛ. ϣⲁⲩⲙⲟⲩϯ ⲉⲣⲟϥ ⲟⲛ ϫⲉ ⲡⲓ7 ⲓⲉ ⲡⲓⲉϩⲟⲟⲩ ⲙ̀ⲙⲁϩ7.

ⲁⲓϭⲓⲧⲥ ϧⲉⲛ

Source
http://sites.google.com/site/pisakho/thecopticyear