Wp/cnh/Baibal Le Bawi Jesuh Kong Bia Le Hla Holh Leh Tik I A Hrampi Bik In Chiah Aak Ruah Ning

From Wikimedia Incubator
Wp > cnh > Baibal Le Bawi Jesuh Kong Bia Le Hla Holh Leh Tik I A Hrampi Bik In Chiah Aak Ruah Ning
< Wp‎ | cnh
Jump to: navigation, search

Thaizing April 20 ni cu Bawi Zisuh thawh tthan cam tuak lawmh nak nizarh ni nisungngai asi. Kan chung khar a thicia mi khi an nungtthan ti hna seh law zeitluk in dah kan ilawmh hnga ti khi tuak in i lawmh len awk ni asi. Thawh tthan ni lawmh nak hi bia a rel mi nan cung cio ah hnangam nak le lawmh nak um hram ko seh!.

Laimi nunphung cu si seh law Sa an thah lai i, Bawi Jesuh le athawh tthan lawmh nak hla le zai long an rel an phuah an vawr in an lam an kui hnga i nitlak khuamuih manh zong an rak itheih manh lo ding khi asi. Asi na in Krifa a lut hmasa mi pawl nih Lainun phung in hi ti i lawmh hlaphuah zaivawr le lam le kui cu vuleicung sunpar nak asi, Krifa phung ah tuah chia an rak ti i tuah lo te in an rak i sum. Hi ruang ah nihin ah kan miphun ngiat nak hloh dih nak lei vun panh kan zalh bantuk thil hi ruah tthan a herh ngai mi asi ko cang rua dah! Hi cu Laimi nih kan Laimi nunphung ah zei tin dah kan i lawmh ning hi langhter phung asi ti khi vun ttial ta duh mi asi.

Bawi Jesuh kong ruah tik ah hin Minung asi nak le Pathian a si nak a pahnih in a um ti hi theology thiam pawl nih cawn piak nak an kan ngeih ttheu ko. Hla chung zong ah "Amah cu minung le Pathian a si, Bawi le khamh tu, kan thangtthat lai" ti a um. Baibal cacaang chung ah dik ciah in a um mi asi ko lai.

Cu caah Bawi Jesuh hi minung a si ve ko ti hi kan ruah ve a herh chel a um ngai ko. Acawn piak nak zong hi minung asi nak in minung nih kan zulh khawh awk lawng asi ti khawh asi. Bawi Jesuh vailam ah khenhchih in an thah lio ah hin minung thi le sa in a tuar ti kan ruah lo ah cun Pathian asi nak in a tuar ti ah cun sullam a ngei lo ding khi asi. Zei cah tiah Pathian fa si nak in an thah asi ah cun a fah lo nak in aa tuah khawh lai i, i tlaih ter khawh lo zong in aa um ter khawh mi asi. Hi ti an tleih khawh i vailam ah an khenh khawh caah nang mah kei mah bantuk minungfa thi le sa in a tak a fah ning hnga tuar piak hnik lawng ah zei tluk har in dah a tuar le a in ti hi tuk sum ngai in ruah khawh asi.

Atu nai te ah hlanthil hlainak lei rian ttuan pawl nih Joseph fapa Jesuh unau James ti in aa ttial mi mithi ruh chiah nak anhlai khawh. Joseph min, Jesuh min le James min ti pawl hi an mah Jews lak ah atam ngai caah Bawi Jesuh nau James asi lai ti dik ciah in an chim kho lo. Bawi Jesuh nau pa James aruh chiah nak asi ah cun Bawi Jesuh kong hlan thil an hmu hmasa bik mi asi lai ti a si. Bawi Jesuh hi vulei ah Meri nih ahrin i vailamtah nak ah an thah ti mi cu a ho hmanh nih an pawm an cohlan cio mi asi. Asi na in Bible ca chung i a kong an ttial mi long in cu ti theih asi ti asi. Hi bantuk hlanthil hlai nak lei in Bawi Jesuh he aa pehtlai mi thil ri hmuh hi a tu long hi a um hmasa mi asi lai ti asi.

Cun Bawi Jesuh cu David Siangpahrang tefa chin asi ti Bible i an ttial mi : Mat-thai 1: 15-16 chungta zoh tik ah: Eli-ud Eleazar pa asi;E-leazar cu Mat-thanpa asi;Matthan cu Jacob pa asi. 16 Jacob cu Josef pa asi . Josef cu Mari va asi, Mari cu Messiah ti mi Jesuh nu kha asi " tiah aa ttial mi kan hmuh. Cu caah Bawi Jesuh hi David te chin asi ti mi hi Josef hi David te chin asi caah Bawi Jesuh cu David techin asi tiah a sawh ti awk in a um. Cu cu Bawi Jesuh cu Joseph nih Mari sin ah a hrin mi fa asi ti sullam ah a chuak ti awk in a hun um nak asi ve.

Cu caah Bawi Jesuh hi minung asi nak hrap lei in kan hmuh tik ah, vulei a um lio ah Josef le Merih an hrin mi minung asi i, hrengkhenh thah a huah khawh hnu a in tuar khawh mi Pathian nih a hmuh hnu long ah a fapa ah a cohlan i, a sin vancung khua lei a cawi hi asi ko ti zong ruah hnga ding phun in a um ve mi asi.

Cu caah minung cio bang anu nih 0thlahra pawi mi asi ve mi Bawi Jesuh cu Pathian a zumh ning a dik mi zumh ning asi tiah Pathian nih a co hlan piak mi asi. Cu caah Pathian nih a mah sin ah a cawi le a lak mi asi. Kan mah Krif pawl zong Bawi Zisuh nih cawn piak nak a ser tak mi Pathian zumh ning hin kan zulh ah cun a zum mipaoh Vancung kai ding ruahchih ngam dih nak asi .

Cu ti minung asi nak in a mah nih a Pa Pathien a zumh ning ah cawnpiak nak a ser tak mi zong hi minung nih zulh khawh awk philosophy an si. Theih awl nak in kan fianter duh rih ah cun ttial duh mi cu minung nih zei ti thil nan ruah le nan tuah ah dah thil nan tuah kip ah hlawh tlin nak le tlam atlin khawh nak asi ti mi ruah nak an si. A chim mi bia pawl zong hi a mah chan lio Judah mi (Jews) pawl lak i thil um tu ning le ruah nak context in a chim a hawt mi an si ti khawh a si.

Cu caah a cawn piak nak Bible ca bia le hla zapi theih khawh awk in holh a let mi hna nih Baibal ca an leh hlan ah Bawi Jesuh chan lio Judah ram nunning le an phung phai le an tuan bia theih nak tampi a ngei mi an si ah cun an Bible ca leh tlam a tlin ngai ding khi asi. A bik in Bible commentary an ttial mi biahram tam pi cherh chan a hau ngai mi asi.

Pu Hrang Nawl nih Bible ca a leh lai ti ka rak theih lio ah Bible ca a cawng lo mi nih Bible ca leh ding i timh cu ca arel tuk mi asi ca long ah aa timh mi asi lai ka rak ti. Cu caah Bible ca cawn lo in Bible leh naa timh si kaw fak na um ngai ko i, Bible ca cawng law Bible lei ah atu nak in kaa chap deuh rih lai ti na ruat maw tiah ka hal hrim. A ka leh mi ah thil a theih ve ning ka fak ngai tthiam ve mi cu Judah mi tuan bia le kong cu tamdeuh ka theih deuh rih hnga ta a ka ti i a ka leh ning ka lung a rak tling ngai. Cu caah Bible leh tik ah theih awk a herh mi arak danh kanh khawh ngai ti khi a fian ter mi asi.

Cu long asi rih hoi lo. A herh rih mi cu, holh pakhat cu holh dang pakhat i leh tik ah a leh mi midang holh i a chim duh mi khi holh dang in a ttial duh tik ah holh dang in an chim mi ning in leh ah cun a ttial tu a chim tu pah chim duh mi a chuah lo in sullam dang pi ah a chuak kho ngai mi asi. Cu caah midang holh nih hi ti a ttial mi khi a leh duh mi holh nih zei tin dah an chim an ttial ding asi ti khi ruah hau ngai asi.

Tahchunh nak ah :- nikhat nai te ah "Good luck!" ti cu Laiholh in zei tin leh dah a ttha lai ti kan i ceih hna. A ning taktak in leh ah cun "Van ttha" ti in kan leh hnga. Asi na in Laimi nih cu bantuk ah "Vanttha! ti hi kan hman rih lo mi si nih a dawh ngai. ' Chun ttha ' ti hi a ho nih dik arak thawk i atu hi tluang ngai dawh ngai in kan hman cang. Cu bantuk in ' Good luck!' ti cu Van ttha! ti zong in hman ah aa dawh ngaite kho men ko hnga.

Phung le lam a chuah mi hi sul or kong ramlak i kan ser thawk mi he khin aa lo ti asi. Mi pakhat nih mizulh bal lo nak ka cu zei ti maw in a ttha ati caah a pah hmasa i sul a ser. Midang zong nih cu sul cu a ttha tiah an zulh leng mang cio ah cun zulh lengmang mi lam ah a hung i cang ko ti asi.

Cu bantuk in mipakhat nih bia maw phung maw a ttha ati mi a vun hman i midang nih a ttha tiah an hman cio ah cun hman tawn miphung ah a vun i cang mi asi. Cu bantuk in atu kan hman leng mang cang mi 'Chun ttha!' ti te ' Mang ttha! ' ti te pawl hi kan mah hna theih hnu i a leng mi long te ansi ko hna. Cu caah Van ttha ti zong cu hman thawk ve awk a si ko. Asi na in, "Na zang vanttha i hngalh te, i hliah te ! " ti hro nak bel ah hman mi asi i a sul lam phun dang pi ah a kal kho mi cu asi ve.

Cu caah atu vial tiang ah cun Van ttha ti cu kan hman mi a si rih lo caah Good luck! cu Vanttha ti in holh ah kan let kho rih hnga lo. "Mangttha!" kan ti hnga maw ti tik ah a kheng deuh fawn lo ti asi. A si na in "Na lam tluang seh" ti mi nih cun a neih ngai ti a si ve.

Hla ah "This is my story this is my song" ti cu Haka hla ca uk ah "Mah hi ka tuanbia le hla asi" ti in dengteu te in leh mi asi. A si na in Tiddim hla ca uk i an leh ning ah cun "Ka gengen ding hi, ka sasa ding" tiah an leh i "Kachim leng mang lai i, ka sak leng mang lai" ti khi asi hnga. Chim ka dai lai lo i, sak zong ka dai lai lo!" ti zong in leh khawh a va si rih hnga

Cu caah miphun dang holh in zei ti i an chim mi zon ah khin kan nih nih zei tin dah kan chim ti in leh hna khi a herh chel atam ngai ti asi.

Cun cu long cu asi rih hoi lo. Bia le holh hi amah le a kong lam cio in technical term ti mi amah le kawichang cio holhbia an ngei dih hna. Tahchunh nak ah 'fir' kan ti tik ah nifa hman mi fir khi a tlangvau bia long in zapi nih theih asi. A si na in upadi chung ah fir ti mi sullam le mi nih zei ti tuah khi dah fir ti asi ti khi a sullam an hrilh fiah mi a um tthan i cu upadichung ta long cu fir le fir lo sum tah nak ah hman mi asi.

Cu bantuk in Bible ca bia zong amah le a kawi chang hman mi holh le bia ' technical term ' a um dih mi asi i, a cawng mi nih ttha deuh in an theih khawh mi asi.

Cu caah CACC in hla an kan leh piak le lehcia mi edit an tuah tik ah hin hla an rak phuah mi a context khi theih hma sa hnu in an kan leh piak le edit an kan tuah piak ttheu ko lai ti cu ruah mi asi. Nitlak lei Mirang holh chim nak ram kan phanh tik ah Lai lei ruah nak in direct in holh kan chim kan ttial mi cu a grammar a hman dih ko zong ah chim ning expression aa khah lo caah an theih lo mi a um len ttheu ko. Kan mah zong nih kan ram i mirang holh kan cawn tik i, kan theih mi chim ning le an society chung kan phanh tik ah kan rak theih ning si lo in an chim ning phun dang tete khi kan theih mi tam ngai a um ve.

Cu caah miphun dang holh le bia hla in a um mi Bawi Jesuh kong in Bible bia le hla holh kha kan mah holh in leh awk a kong ruah tik ah amah can lio cio i a velchum thil um tu ning theih hnu ah leh le chim long hman si lo in midang holh nih hi tin an chim mi zon ah kan mah holh ah zei tin kan chim mi khi dah asi ti le a mah kawichang holh le bia hman hman in leh khawh cu a ttha bik mi a si ko hnga dah. Cu caah bia a dong par in ttawh i leh lo in bia hram thil um tu ning cung ah hngatchan cherhchan in an chim le an ttial duh ning langh ter nak in holh leh le ttial cu a tthat bik ning asi nih a dawh ngai ko. Cu ti asi long ah a chim tu pa a phuah tu pa chim duh mi phuah duh mi spirit a khen bik ding khi ruah hau ngai asi ti chim duh mi asi.

Aleng Zulhnak[edit]