Wp/chi/Matthe ah guk ng'thu ni

From Wikimedia Incubator

Matthe ah guk ah ng'Thu Ni naw, cacim pyim ung Khanpughi naw ak chang gui-am shaitaak nak a peit gui cu, Hunbawi Jesuh awn kümbe sak ci, ciah ng'Thu Ni cu dang sak ci.Shin ah ng'Thu Ni cu Bawipa Jesuh ah ang tüi om law nak ah Jew chang gui ah hmawk bäng ah kä kiak ci, khomdek khan chang avan ah hmawk ah kiak ci.

Matthe naw shin ah ng'Thu Ni cu ng'müi khai ah tän ne a guk ah kiak ci. Bawipa Jesuh ah ang tüi nak ung tün ne, tui ang hnim nak, khoshe ah tüihtok nak, la Kalile kho ung ng'Thu Ni a pyein nak, am theithang nak, gawpai ci a gai sak nak gui cu tän ne guk ci. Cun kawn ah Kalile kho ung kaa naw, Jerusalem ah a hteh nak ah mawng la ak hnubäih kho hnüüp chih ah kyong ung kutlamtung ung ami ngawn ah mawng, la sih nak ung kaa a thawh law ba ah mawng gui cu gu ba ci.

Shin ah ng'Thu Ni ung Bawipa Jesuh cu Khanpughi ah Thukhän m'hlan ne pyein hning ciah ang vai pi bäih saza la Khanpughi ah uk nak kho ah mawng m'theithang hning ciah Bawipa ah a kiak ah mawng cu dang sak ci. Bawipa Jesuh ah m'theithang nak gui cu, avan m'dawn ung mawng hma ah m'chaa vai kiak ci. Cun gui cu; (1) Khankho kyong ung om ciah chang gui ah ami om ih bilawh gui, gah law gui vai la mawngma nak gui vai m'dang ciah khomhtung khan ah ang cäi nak (akdäm 5-7); (2) Angdüihpüi gha-lei-goi naw bi ami bi vai lam am shüm nak gui (akdäm 10); (3) Khankho ah mawng am tumtäng nak gui(akdäm 13); (4) Bawipa Jesuh läk ciah chang gui ah om ih vai am theithang nak (akdäm 18); (5)Tuhbäi khomdek ang pyi law vai ah mawng la Khanpughi ah Uknak kho a gawk law vai ah mawng (akdäm 24-25).