Wp/bjn/Anguy
From Wikimedia Incubator
Anguy (Bahasa Indonesia: Bunglon) adalah sa'ikung janis reptil nang tamasuk ka dalam suku (familia) Agamidae. Kadal lain nang masih sasuku adalah cacak tarabang (Draco spp.) wan soa-soa (Hydrosaurus spp.).
Anguy ba'isi babarapa marga, nangkaya Bronchocela, Calotes, Gonocephalus, Pseudocalotes wan nang lain-lain. Bunglon bisa ma'ubah-ubah kalir kulimbitnya, tagal kada sahebat nangkaya ma'ubah kalir satua chamaeleon (suku Chamaeleonidae). Nang biasanya ba'ubah tumat kalir-kalir cerah (hijau, kuning, atawa habuk tarang) manjadi kalir nang labih kadap, kasusuklatan atawa kahihirangan.
Contents |
[edit] Anguy Suray
Anguy suray ba'isi ngaran ilmiah Bronchocela jubata Duméril & Bibron, 1837. Dalam bahasa lain, dingarani bunglon (Jkt., Jw.), londok atawa lunduk (Sd.), atawa green crested lizards (Ingg.). Ngaran lainnya dalam bahasa Inggris cukup manyasatakan: bloodsuckers, karana kanyataanya kadal ini kada suah hingkat ma'isap darah.
Anguy ini manyabak di pulaw-pulaw Jawa, Kalimantan, Bali, Singkep, Sulawesi, Karakelang wan Kapulawan Salibabu, wan Filipina.
[edit] Deskripsi awak
Anguy kabun nang baukuran sadang, babuntut panjang bajuntay. Panjang sabukuan hinggan 550 mm, wan ampat-parlimanya adalah buntut. Garigi di burit tundun wan punggungnya labih manyarupai suray daripada bantuk katopong (mahkota), tagal ha kada nangkaya dangsanak sabubuhannya nang paling parak B. cristatella (crista: jambul, mahkota). Garigi ini ba'isi banyak sisik nang pipih panjang maruncing tagal lunak nangkaya kulimbit.
Kapalanya basagi-sagi wan babuncu. Dagu bakantung libar, batulang lunak. Mata dikulilingi palupuk nang cukup libar, lantur, tasusun tumatan sisik-sisik baujud bintik-bintik halus nang bengkeng.
Dorsal (sisi atas awak) bawarna hijaw anum sampay hijaw tuha, nang kawa ba'ubah manjadi suklat sampay kahihirangan kabila marasa taganggu. Sabuting bercak suklat kahabang-habangan sarupa tagar tadapat di balakang muntung di bawah timpanum. Deretan bercak sarupa itu, nang rancak manyatu manjadi curitan-curitan, tadapat di bahu wan di sisi lateral bagian hadapan; samagin ka balakang samakin kabus kalirnya.
Sisi ventral (sisi bawah awak) kakuning-kuningan sampay kaputih-putihanan di dagu, panggulu, parut wan sisi bawah batis. Talapak tangan wan batis suklat kakukuningan. Buntut di pangkal bawarna hijaw babalang-balang kabibiruan, ka balakang samagin kasusuklatan kubas lawan balang-balang kapuputihan di hujungnya.
Sisik-sisik anguy suray karas, kasar, balunas kuat; buntutnya tarasa basagi-sagi. Parkacualiannya adalah sisik-sisik jambul, nang kada balunas wan pina lunak sarupa kulimbit.
[edit] Kabiasaan
Anguy nang karap didapati di harung wan puhun-puhun panaduh di kabun wan tungkaran. Rancak jua didapati gugur tumatan puhun sawayah manyasah mangsanya, tagal inya hancap bukah manuju puhun nang parak.
Reptil ini mamangsa bamacam-macam sarangga nang didapatinya: kupu-kupu, rama-rama, kasasiur, biranga wan lain-lain. Gasan manipu mangsanya, anguy ini karap badiam diri di pucuk puhun atawa bagoyang-goyang bagemet nangkaya ditiup angin. Rancak jua anguy suray talihat maniti kabel listrik parak rumah handak manyubarang tumatan wadah nang sabuting ka wadah nang lain.
Anguy suray bahintalu di tanah nang gambur, bapasir atawa baserasah. Nangkaya umumnya anggota suku Agamidae, indung anguy manabuk tanah mamakay muntungnya. Kulimbit hintalunya bawarna putih, lantur pina liat sarupa perkamen.
Wayah pangamatan nang digawi di hutan Situgede, Bogor mancatat bahwa hintalu anguy suray dipatak di tanah bapasir di bawah lapisan serasah, parsisnya di bawah harung di bagian hutan nang pina tabuka. Hintalu banyaknya dua bigi, lonjong panjang lk. 7×40 mm, diandak bajejer wan ditimbun tanah tipis. Di Gunung Walat, Sukabumi, didapati hintalu nang diandak di lapisan humus nang halus di tangah-tangah jalanan satapak.
[edit] Kaistimewaan
Kabila anguy marasa taancam, inya akan maubah kalir kulimbitnya manjadi sarupa lawan kalir lingkungan sakulilingnya, sahingga inya tasamar. Fungsi panyamaran kaya ini disambat urang kamuflase. Panyamaran pada satua dangan cara maubah kalir kulimbitnya disambat jua mimikri.
